خبرنامہ نمبر 3408/2026
کوئٹہ27 اپریل ۔گورنربلوچستان جعفرخان مندوخیل نے کہا کہ الحمدللہ ہم نے ہائیر ایجوکیشن سیکٹر کو بحران سے بحالی کی جانب گامزن کرنے میں کامیابی حاصل کی۔ وژن اور ٹیم ورک کی توسط سے بلوچستان کی تمام پبلک سیکٹر یونیورسٹیوں میں معنی خیز اصلاحات لائے۔ پبلک سیکٹر یونیورسٹیوں کا بجٹ 2.5 ارب روپے سے بڑھا کر 8 ارب روپے کر دیا جس سے ادارہ جاتی ترقی اور ہر یونیورسثی میں تجدید ہو رہی ہے۔ ان دانشمندانہ فیصلوں نے صوبے کی تمام یونیورسٹیز کی رینکنگ اینڈ اسکورنگ کو بلند کیا جس سے کوالٹی ایجوکیشن کی بنیاد پڑی۔ اس رفتار کو جاری رکھتے ہوئے آج ہم نے بیوٹمز یونیورسٹی میں ہائی وولٹیج انجینئرنگ لیبارٹری اور سہولیات کی مظبوطی کے مرکز کا افتتاح کیا جو پائیدار ترقی اور آگے بڑھنے کی بصیرت کی غمازی کرتا ہے۔ یہ بات انہوں نے بیوٹمز یونیورسٹی میں ہائی ولٹیج انجینئرنگ لیبارٹری اور سہولیات کی مضبوطی سینٹر کا افتتاح کرتے ہوئے کیا۔ اس موقع پر وائس چانسلر بیوٹمز یونیورسٹی ڈاکٹر خالد حفیظ، پرو وائس چانسلر ڈاکٹر میرویس کاسی، پرنسپل سیکرٹری ٹو گورنر بلوچستان عبدالناصر دوتانی اور ڈائریکٹر پی اینڈ ڈی بیوٹمز ڈاکٹر سعید اللہ جان مندوخیل سمیت تمام متعلقہ شعبوں کے سربراہان موجود تھے۔ گورنر بلوچستان جعفرخان مندوخیل کو دونوں منصوبوں سے متعلق بریفننگ دی گئی۔ اس موقع پر گورنر بلوچستان جعفرخان مندوخیل نے کہا کہ بلوچستان پبلک سیکٹر یونیورسٹیوں میں ضروری سہولیات تک رسائی کو یقینی بنا کر ہم نے ایک ایسا تعلیمی ماحول پیدا کیا جہاں سیکھنے اور جدت کاری کو حقیقی معنوں میں فروغ ملا۔ اب وقت پر تنخواہوں کی وصولی کے ساتھ تمام فیکلٹی ممبران یونیورسٹی اسٹوڈنٹس کے ذہنوں کو جدید علمی جہاں بینی سے روشن کرنے کیلئے پوری دلجمی کے ساتھ اپنے فرائص انجام دے رہے ہیں۔ سرکاری یونیورسٹیوں میں سولر سسٹم کی تنصیبات اور اضافی اراضی کو زیر کاشت لانے کے اقدامات بنیادی ڈھانچہ کو مضبوط کیا ہے۔ ہمارے صوبے میں ہائیر ایجوکیشن کا شعبہ اب نئی توانائی اور مقصد کے ساتھ ابھر رہا ہے، ایک روشن اور زیادہ امید افزا مستقبل کی طرف مسلسل بڑھ رہا ہے۔
﴾﴿﴾﴿﴾﴿
خبرنامہ نمبر3409/2026
کوئٹہ 27اپریل ۔ کوئٹہ میں پولیس کی ایگل اسکواڈ کی مبینہ فائرنگ سے نوجوان خالد ساسولی کی ہلاکت کے واقعے سے متعلق صوبائی وزیر داخلہ میرضیاء اللہ کی ہدایت پر ایڈیشنل چیف سیکرٹری داخلہ حمزہ شفقات نے مقتول خالد ساسولی کے والد سے ملاقات کی جس میں انہیں واقعے کی پیش رفت اور جاری تحقیقات سے متعلق تفصیلی آگاہ کیا حکومت نے واضح کیا واقعے کی تحقیقات کے لیے انکوائری ٹیم تشکیل دے دی گئی ہے، جو تمام پہلووں کا باریک بینی سے جائزہ لے رہی ہے مقتول کے اہلخانہ کو انصاف کی فراہمی ہر صورت یقینی بنائی جائے گی متاثرہ خاندان کے ساتھ بلوچستان حکومت کی نہ صرف ہمدردیاں ہیں بلکہ ان کے ساتھ مکمل تعاون بھی کیا جائے گا مشکل کی اس گھڑی میں انہیں تنہا نہیں چھوڑا جائے گا۔
﴾﴿﴾﴿﴾﴿
خبرنامہ نمبر3410/2026
کوئٹہ: 27اپریل 2026وزیر توانائی بلوچستان میر اصغر رند، وزیر ماہی گیری بلوچستان برکت رند اور سابق صوبائی وزیر سکندر عمرانی نے اپنے وفد کے ہمراہ حکومتِ بلوچستان کے محکمہ آبپاشی کے سیکریٹری سہیل الرحمان بلوچ سے اہم ملاقات کی۔ملاقات کے دوران صوبے میں جاری اور مجوزہ آبپاشی منصوبوں، زرعی ترقی اور پانی کے موثر استعمال سے متعلق امور پر تفصیلی تبادلہ خیال کیا گیا۔ سیکریٹری آبپاشی نے وفد کو جاری ترقیاتی اسکیموں، بالخصوص چھوٹے اور درمیانے درجے کے ڈیموں کی تعمیر، نہری نظام کی بہتری اور پانی ذخیرہ کرنے کی صلاحیت بڑھانے کے اقدامات پر بریفنگ دی۔وزیر توانائی میر اصغر رند نے اس موقع پر کہا کہ بلوچستان میں توانائی کے شعبے کی بہتری حکومت کی اولین ترجیحات میں شامل ہے۔ انہوں نے شمسی توانائی، ہوا سے بجلی پیدا کرنے کے منصوبوں اور دیہی علاقوں کی بجلی تک رسائی کو یقینی بنانے کے لیے جاری اقدامات پر روشنی ڈالی۔ ان کا کہنا تھا کہ توانائی اور آبپاشی کے منصوبوں کو باہم مربوط کر کے زرعی شعبے کو مزید مستحکم بنایا جا سکتا ہے۔وزیر ماہی گیری برکت رند نے آبی ذخائر میں اضافے کو ماہی گیری کے فروغ کے لیے ناگزیر قرار دیتے ہوئے کہا کہ نئے ڈیموں کی تعمیر سے نہ صرف زراعت بلکہ فشریز سیکٹر کو بھی خاطر خواہ فائدہ پہنچے گا، جس سے مقامی معیشت کو تقویت ملے گی۔اس موقع پر اس بات پر بھی اتفاق کیا گیا کہ صوبے میں پانی کی کمی پر قابو پانے کے لیے جدید ٹیکنالوجی کو بروئے کار لایا جائے گا، جبکہ جاری ڈیم منصوبوں کی بروقت تکمیل کو یقینی بنایا جائے گا۔ مزید برآں، توانائی کے متبادل ذرائع کو فروغ دے کر زرعی ٹیوب ویلز کو سستی اور پائیدار بجلی فراہم کرنے کے امکانات کا بھی جائزہ لیا گیا۔اجلاس کے اختتام پر باہمی تعاون کو فروغ دینے اور متعلقہ محکموں کے درمیان روابط مزید مضبوط بنانے کے عزم کا اعادہ کیا گیا۔
