۔ڈاکٹر عمرانہ مشتاق 10 اکتوبر 1962میں سیالکوٹ پیدا ہوئیں۔ ابتدائی تعلیم گوجرانوالہ سے حاصل کی

10 اکتوبر یومِ پیدائش
ڈاکٹر عمرانہ مشتاق
آج عصرِ حاضر کی مقبول و معروف اور ہر دل عزیز ادبی شخصیت ڈاکٹر عمرانہ مشتاق کا جنم دن ہے۔ڈاکٹر عمرانہ مشتاق 10 اکتوبر 1962میں سیالکوٹ پیدا ہوئیں۔ ابتدائی تعلیم گوجرانوالہ سے حاصل کی ۔ ایم۔ ایس ۔ سی۔ ایم فل اور پی۔ایچ ۔ ڈی کی ڈگریاں پنجاب یونیورسٹی لاہور سے حاصل کیں ۔ ان کی شخصیت کی بے شمار جہتیں ہیں ۔ وہ صحافی ، کالم نگار ، اینکر پرسن ، شاعرہ ، ناول نگار، افسانہ نگارہونے کے ساتھ ساتھ درس و تدریس سے بھی وابستہ ہیں۔ UMT پریس فورم کی کنوینئر ہیں۔ پائینا ادبی فورم کی میڈیا کواڈینٹر ، انٹرنیشنل رائٹرز کونسل کی چیئر پرسن ، ماہنامہ تفکر میگزین اور تفکر ڈاٹ کام ویب سائیٹ کی مدیرِ اعلیٰ ، اور میڈیا رائٹرز کونسل کی ایگزیٹو ممبر بھی ہیں پاکستان اور انڈیا سے انہیں کئی ایوارڈز سےبھی نوازا گیا اور ان کی شاعری پر ایم اے کا مقالہ بھی لکھا گیا۔ شاعری کا آغاز سکول کی تعلیم کے دوران میں ہی کیا۔ اُردو اور پنچابی دونوں زبانوں میں شعر کہتی ہیں۔ وہ متعدد کتابوں کی مصنف ہیں۔ اُن کے ادبی اثاثے میں ۔۔۔۔
۱: ہجر کا عذاب
۲: اماوَس
۳: کربِ جاں
۴: سمندر میں ستارہ
۵: لیکھاں دی پھلواری (پنجابی شاعری)
۶: وحشتوں کی بستی میں (ناول)
۷: اس شکل کو میں نے بھلایا نہیں ( جنابِ منیر نیازی کر حوالے سے کتاب )
۸: دلوں کی شہزادی ( محترمہ بے نظیر ۔۔۔۔ کے حوالے سے کتاب )
۹: دل کی بات (کالم )
۱۰: باڑ میں پھول ( سفر نامہ انڈیا )
۱۱۔ خوابوں کے سوداگر (افسانے)
منتخب اشعار
خیر یہ اچھا ہوا، ترکِ تعلق کر لیا
تم سے آخر ایک دن یہ فیصلہ ہونا ہی تھا
سوچ کے زنداں میں آخر ہم مقید ہو گئے
طے کبھی تو ہم سے ایسا مرحلہ ہونا ہی تھا
۔۔۔۔۔۔۔۔۔۔۔۔۔۔۔۔
کنارہ ہی نہیں ملتا نظر کو اس طرف کا
سمندر کی نئی تجسیم کرنا چاہتی ہوں
۔۔۔۔۔۔۔۔۔۔۔۔۔۔۔
غزل جو بھی کہوں وہ صرف تیرے نام کی ہو
تمہارے پیار کی تفہیم کرنا چاہتی ہوں
۔۔۔۔۔۔۔۔۔۔۔۔۔۔
کسی کی نیند بن جاؤں کسی کا خواب ہو جاؤں
محبت کی گزر میں راحتوں کا باب ہو جاؤں
نظر انداز ہوتی ہوں تو یہ بھی دل میں آتا ہے
مجھے ڈھونڈا کریں سب ہی میں یوں نایاب ہو جاؤں
۔۔۔۔۔۔۔۔۔۔۔۔۔۔۔۔
تمہارے بن میں اک جلتا ہوا صحرا ہوں ویراں سا
اگر رہنے لگو مجھ میں تو میں شاداب ہو جاؤں
۔۔۔۔۔۔۔۔۔۔۔۔۔
میں اکثر پوچھتی رہتی ہوں خود سے
یہاں سب کچھ ہے ، لیکن تو کہاں ہے
۔۔۔۔۔۔۔۔۔۔۔۔۔۔۔
وہ مرے ساتھ شب و روز بتانے والے
یاد آتے ہیں بہت چھوڑ کے جانے والے
۔۔۔۔۔۔۔۔۔۔۔۔۔
موسمِ گل میں جو یادوں کی ہوا چلتی ہے
پھول بن جاتے ہیں سب زخم پرانے والے
۔۔۔۔۔۔۔۔۔۔۔۔۔۔۔
میں کہاں وقت کی رفتار سے چل سکتی تھی
مجھ کو اس عہدِ ریا تک مرا رہبر لایا
۔۔۔۔۔۔۔۔۔۔۔۔
کوئی تارا نگاہِ منتظر میں تھام کے رکھنا
بہت ممکن ہے ہم کو راستے میں شام ہو جائے
۔۔۔۔۔۔۔۔۔۔۔۔۔
عجب نہیں کہ دیے سے شکست کھا کے بھی
چراغ پا نہ ہوئی اب کے بد زبان ہوا
۔۔۔۔۔۔۔۔۔۔۔
اجنبی بستی کے لوگوں سے ذرا نظریں ملا
مل ہی جائے گا یہاں بھی جانا پہچانا کوئی
۔۔۔۔۔۔۔۔۔۔۔۔۔۔۔۔۔۔۔
اے کاش کوئی دیکھے مرے ضبط کا عالم
بے کل ہوں مگر ماتھے پہ بل کوئی نہیں ہے
۔۔۔۔۔۔۔۔۔۔۔۔۔
روح سے جسم الگ کرنے کے پسِ منظر میں
ہے کوئی ہاتھ یقیناً کسی ہرجائی کا
۔۔۔۔۔۔۔۔۔۔۔۔
تم سے ہم اور بھلا کیسی شکایت کرتے
تم تو اپنے بھی نہیں اور ہمارے بھی نہیں
۔۔۔۔۔۔۔۔۔۔۔۔۔۔
ڈبویا خود ہمارے وسوسوں نے
سمندر میں بھنور ایسا نہیں تھا
۔۔۔۔۔۔۔۔۔۔۔۔۔
آ کہ پہلی بار ہم اک دوسرے کو دیکھ لیں
چند لمحوں بعد یہ آنکھیں بجھا دی جائیں گی
۔۔۔۔۔۔۔۔۔۔۔۔۔۔۔۔۔۔۔۔
Courtesy Global Art & Literary Forum