ساجد حسن استحکام پاکستان پارٹی میں شامل

سینئر اداکارساجد حسن استحکام پاکستان پارٹی میں شامل ہوگئے ہیں۔

استحکام پاکستان پارٹی کے صوبائی صدر محمود مولوی نے ساجد حسن کو پارٹی پرچم کا مفلر پہنا کر پارٹی میں خوش آمدید کیا۔

میڈیا سے گفتگو کرتے ہوئے ساجد حسن کا کہنا تھا اس وقت ہمیں انتشار اور تقسیم کی بجائے جوڑنے کی سیاست کرنی ہے۔محمود مولوی کا اس موقع پر کہنا تھا کہ ساجد حسن شوبز اور صنعتی انڈسٹری میں اپنا ایک الگ مقام رکھتے ہیں، اور ان کو ہم پارٹی میں خوش آمدید کہتے ہیں۔

دوسری جانب صدر آئی پی پی عبدالعلیم خان نے کہا کہ پاکستان کو مستحکم حکومت کی ضرورت ہے ، الیکشن کے بعد بننے والی حکومت 5سال کا پلان دے گی۔

میڈیا سے گفتگو کرتے ہوئے انہوں نے کہا کہ پنجاب سے تقریباً 50فیصد امیدوار الیکشن میں حصہ لے رہے ہیں ،آئندہ حکومت میں آئی پی پی اہم کردار ادا کرے گی۔

بہت سی جگہوں پر ن لیگ سے سیٹ ایڈجسٹمنٹ نہیں ہوئی ،سندھ میں بھی ہمارے امیدوار الیکشن لڑ رہے ہیں ،زراعت ہمارے لیے ریڑھ کی ہڈی کی حیثیت رکھتی ہے ،ہم ابھی تک زراعت سے فائدہ نہیں اٹھا سکے۔

بہت ساری سرکاری زمین بنجر پڑی ہے ،سرکاری زمین کو عوام کی فلاح کیلئے استعمال ہو ناچاہیے ،جن لوگوں کے پاس مکان نہیں انہیں 3مرلہ کے پلاٹ ملنے چاہئیں۔

ہم نے متوسط طبقے کیلئے300یونٹ تک مفت بجلی کا اعلان کیا ،موقع ملا تو موٹر سائیکل والوں کوپیٹرول آدھی قیمت پر دیں گے ۔

ساڑھے 12ایکڑ سے کم والے کسان کیلئے بھی بجلی مفت ہو گی ،پاکستان قوم کے اندر بہت اہلیت ہے ،ایسا سسٹم چاہیے جسے لوگ سمجھ سکیں۔

ہمارا منشور عوام کی توقعات کے قریب ترین ہے ،آئندہ حکومت جس کی بھی آئے اس منشور پر عمل کرے ،ذاتی ، اخلاقی طور پر سمجھتا ہوں پی ٹی آئی کو انتخابی نشان ملنا چاہیے۔

قانونی طور پر پی ٹی آئی سے کوتاہی ہوئی ہے ،9مئی ہمارے لیے ریڈ لائن ہے۔

https://www.youtube.com/watch?v=ak0DHASC