ویکسین سے متعلق افواہوں پر کان نہ دھریں: نعمان اعجاز

پاکستان شوبز انڈسٹری کے سینئر اداکار نعمان اعجاز نے کورونا ویکسین لگوانے کے بعد عوام کے لیے خصوصی پیغام جاری کیا ہے۔

سوشل میڈیا سائٹ انسٹاگرام پر نعمان اعجاز نے اپنی نئی ویڈیو شیئر کی ہے جس میں اُنہیں عالمی وبا کورونا وائرس سے بچاؤ کے لیے ویکسین لگواتے ہوئے دیکھا جاسکتا ہے۔

نعمان اعجاز نے ویڈیو کے کیپشن میں عوام سے مخاطب ہوتے ہوئے لکھا کہ ’آداب! میں تمام لوگوں سے کورونا ویکسین لگوانے کی درخواست کرتا ہوں۔‘

اداکار نے لکھا کہ ’کورونا ویکسین کے حوالے سے سوشل میڈیا پر زیرِگردش افواہوں پر اپنے کان مت دھریں۔‘
اُنہوں نے لکھا کہ ’کورونا ویکسین ہمیں اور ہمارے پیاروں کی زندگیوں کو محفوظ کرے گی۔‘

نعمان اعجاز نے دُعا کرتے ہوئے لکھا کہ ’اللّہ تعالیٰ ہم سب پر اپنی رحمت فرمائے۔‘

خیال رہے کہ نعمان اعجاز سے قبل بھی پاکستان شوبز کے کئی فنکار ویکسین لگواچکے ہیں جن میں عدنان صدیقی، ایاز سمو، ندا یاسر، یاسر نواز، ماہرہ خان، فیصل قریشی، ہمایوں سعید، احمد علی بٹ، حرا مانی، بشریٰ انصاری، ارمینا خان، عفت عُمر، حنا خواجہ، سیمی راحیل اور ثمینہ پیرزادہ سمیت دیگر شامل ہیں۔