وفاقی وزیر برائے منصوبہ بندی احسن اقبال نے اعلان کیا ہے کہ اگلے سال پاکستانی خلابازوں کو خلا میں بھیجنے کا منصوبہ تیار کیا جا رہا ہے۔
پاکستان کی خلائی ایجنسی سپارکو اور چین کی مرکزی خلائی ایجنسی نے انسانی خلائی پرواز کے پروگرام کے تحت تعاون کے لیے معاہدہ کیا ہے۔
دو پاکستانی امیدواروں کو چین کے ایسٹرانٹ سینٹر میں تربیت دی جائے گی، اور ان میں سے ایک کو سائنٹیفک پےلوڈ اسپیشلسٹ کے طور پر منتخب کیا جائے گا۔
انتخابی عمل اس سال شروع ہوا ہے اور اسے 2026 تک مکمل کرنے کا ہدف مقرر کیا گیا ہے۔ اس کے بعد منتخب خلاباز کو چین کے خلائی اسٹیشن پر بھیجا جائے گا، جہاں وہ مختلف شعبوں میں تجربات کرے گا، جیسے حیاتیات، طبی سائنس، فلوئڈ میکینکس، مواد کی تحقیق، ماحولیات اور فلکیات۔
وفاقی وزیر احسن اقبال نے اس پروگرام کی تصدیق کرتے ہوئے کہا کہ پاکستان کی کوشش ہے کہ 2026 تک اپنا پہلا خلاباز چینی خلائی اسٹیشن پر بھیج سکے۔
