وزیراعلیٰ پنجاب مریم نواز شریف کی خصوصی ہدایت پر یومِ آزادی کی تقریبات کا باضابطہ آغاز ہو چکا ہے، جنہیں اس سال “معرکۂ حق” میں قوم کی فتح کے جذبے کے تحت منایا جا رہا ہے۔ اس سال جشنِ آزادی کا مرکزی عنوان “حصولِ آزادی سے تحفظِ آزادی تک” رکھا گیا ہے، جس کا مقصد قوم کے اتحاد، قربانی اور دفاعِ وطن کے جذبے کو خراجِ تحسین پیش کرنا ہے۔
پنجاب کے تمام اضلاع میں خصوصی تقریبات کا اہتمام کیا جا رہا ہے۔ یکم سے 14 اگست تک کی تقریبات کا شیڈول پہلے سے ترتیب دیا جا چکا ہے۔ جشن آزادی کی مرکزی تقریب 14 اگست کو حضوری باغ لاہور میں منعقد ہوگی، جہاں وزیراعلیٰ مریم نواز شریف پرچم کشائی کریں گی۔ اسی روز وہ ایکسپو سینٹر لاہور میں “معرکۂ حق پارک”، “معرکۂ حق میوزیم” اور “یادگارِ معرکۂ حق” کا بھی افتتاح کریں گی۔
پنجاب بھر میں مختلف طبقہ ہائے زندگی سے تعلق رکھنے والے افراد کی بھرپور شرکت کے ساتھ تقریبات منعقد کی جائیں گی۔ شہروں، بازاروں، دکانوں اور رہائشی علاقوں کو قومی پرچموں اور جھنڈیوں سے سجایا جا رہا ہے، اور گھروں پر پاکستانی پرچم لہرانے کی مہم بھرپور انداز میں جاری ہے۔
سرکاری و نجی عمارات پر چراغاں کا سلسلہ بھی شروع ہو چکا ہے۔ جشنِ آزادی کے موقع پر خصوصی روڈ شوز اور ثقافتی فلوٹس کا انعقاد کیا جائے گا تاکہ پاکستان کی متنوع ثقافت کو اجاگر کیا جا سکے۔ 9 اگست کو مینارِ پاکستان پر آتش بازی اور لیزر شو کا شاندار مظاہرہ ہوگا، جبکہ تحصیل و ڈویژن سطح پر بھی ایسی تقریبات کا انعقاد کیا جائے گا۔
10 اگست کو وزیراعلیٰ آفس اور دیگر اہم سرکاری اداروں میں پرچم کشائی کی تقریبات ہوں گی، اور 13 اگست کو موٹر بائیک ریلی منعقد کی جائے گی۔
اس سال جشنِ آزادی کی تقریبات میں نوجوانوں اور بچوں کو خصوصی اہمیت دی جا رہی ہے۔ تقریبات میں “معرکۂ حق”، “بنیان مرصوص” اور “قومی وقار” جیسے موضوعات کو اجاگر کیا جائے گا۔ یوم آزادی پر قومی ہیروز، فنکاروں، کھلاڑیوں، اور بچوں کے پیغامات نشر کیے جائیں گے، تاکہ جشن کو قومی یکجہتی کا مظہر بنایا جا سکے۔
اپنے خصوصی پیغام میں وزیراعلیٰ مریم نواز شریف نے کہا کہ “معرکۂ حق” نے قوم میں آزادی کی قدر و قیمت کو مزید اجاگر کر دیا ہے۔ انہوں نے مسلح افواج کے سربراہ فیلڈ مارشل سید عاصم منیر کی قیادت کو خراجِ تحسین پیش کرتے ہوئے کہا کہ افواجِ پاکستان نے آزادی کے تحفظ میں ایک سنہری باب کا اضافہ کیا ہے۔
وزیراعلیٰ نے اہلِ وطن—خصوصاً ماؤں، بہنوں، بیٹیوں، بیٹوں، بھائیوں اور بزرگوں—سے اپیل کی کہ وہ یومِ آزادی کی تقریبات میں بڑھ چڑھ کر شرکت کریں اور دنیا کو دکھا دیں کہ ہم ایک زندہ، خوددار اور باوقار قوم ہیں۔
