پنجاب فوڈ اتھارٹی نے گجرات کے علاقے بھمبر روڈ، قادر کالونی کے قریب ایک گودام پر بڑی کارروائی کرتے ہوئے جعلی دودھ بنانے کا بڑا نیٹ ورک بے نقاب کر دیا۔
تفصیلات کے مطابق کارروائی کے دوران ٹیم نے گودام سے 32 ہزار 500 کلو مصنوعی ملک پاؤڈر اور 435 کلو پیکنگ مواد قبضے میں لے لیا۔ اس کے علاوہ دودھ تیار کرنے والی مکسر مشین، خالی بیگ اور دیگر اشیاء بھی تحویل میں لے لی گئیں۔
ترجمان پنجاب فوڈ اتھارٹی کا کہنا ہے کہ یہ جعلی دودھ روزانہ شہر اور آس پاس کے علاقوں میں سپلائی کیا جا رہا تھا۔ واقعے میں ملوث افراد کے خلاف قانونی کارروائی کا آغاز کر دیا گیا ہے، اور مقدمہ درج ہو چکا ہے۔
حکام کا کہنا ہے کہ انسانی صحت سے کھیلنے والوں کے خلاف سخت اقدامات کیے جائیں گے اور اس سلسلے میں کوئی نرمی نہیں برتی جائے گی۔
فوڈ اتھارٹی نے عوام سے اپیل کی ہے کہ اگر انہیں کسی بھی قسم کی مشکوک خوراک یا دودھ کی فراہمی کی اطلاع ہو تو فوراً متعلقہ ادارے کو اطلاع دیں تاکہ شہریوں کو محفوظ، خالص اور معیاری خوراک کی فراہمی یقینی بنائی جا سکے۔
