لاہور میں چینی کی قلت پر قابو نہ پایا جا سکا، گلی محلوں کی دکانوں پر آج بھی چینی دستیاب نہیں ہے۔
مارکیٹ ذرائع کے مطابق، کھلے بازار میں چینی کی قیمت بدستور 200 روپے فی کلو ہے، جبکہ طلب اور رسد کے عدم توازن کے باعث نرخ میں مزید 20 روپے فی کلو کا اضافہ دیکھنے میں آیا ہے۔
ذرائع کا کہنا ہے کہ چند بڑے ریٹیلرز ضلعی انتظامیہ کے دباؤ پر 173 روپے فی کلو کے حساب سے چینی فروخت کر رہے ہیں، مگر یہ مقدار ناکافی ہے۔
شوگر ڈیلرز ایسوسی ایشن کے مطابق، چھوٹے تاجروں کے پاس چینی مکمل طور پر ختم ہو چکی ہے، اور بعض مقامات پر قیمت 220 روپے فی کلو تک پہنچ گئی ہے۔
اکبری منڈی کے تاجر سہیل ملک نے انکشاف کیا کہ شوگر ملز جان بوجھ کر چینی کا اسٹاک روک رہی ہیں۔ ان کے مطابق، مارکیٹ میں روزانہ 1500 میٹرک ٹن چینی آنی چاہیے تھی، لیکن صرف 24 ٹن کی محدود مقدار ہی فراہم کی گئی ہے۔
بحران کی یہ صورتحال حکومت اور متعلقہ اداروں کی توجہ کی متقاضی ہے تاکہ عوام کو ریلیف فراہم کیا جا سکے۔
