وزیراعلیٰ پنجاب مریم نواز شریف کی ہدایت پر صوبے کے تمام اضلاع میں جدید طرز کے واٹر فلٹریشن پلانٹس قائم کرنے کا فیصلہ کیا گیا ہے۔ اس سلسلے میں وزیر ہاؤسنگ و اربن ڈویلپمنٹ بلال یاسین کی زیر صدارت صاف پانی اتھارٹی کے تحت منصوبے پر پیش رفت کا جائزہ اجلاس منعقد ہوا۔ اجلاس میں سیکریٹری ہاؤسنگ نورالامین مینگل، سی ای او صاف پانی اتھارٹی نوید احمد اور دیگر متعلقہ افسران شریک تھے۔
بلال یاسین نے اجلاس میں ہدایت کی کہ زیادہ آبادی والے علاقوں میں پلانٹس کی تنصیب کو یقینی بنایا جائے، تاکہ زیادہ سے زیادہ افراد کو صاف پانی میسر آ سکے۔ انہوں نے مزید بتایا کہ سکیورٹی اور نگرانی کے لیے فلٹریشن پلانٹس پر جدید سکارڈا (SCADA) سسٹم نصب کیا جائے گا۔ تمام پلانٹس کو شمسی توانائی پر منتقل کیا جائے گا، جبکہ زیر زمین پانی کے معیار کو مدنظر رکھتے ہوئے ان کی تنصیب کے مقامات کا تعین کیا جائے گا۔
دوسری جانب، وزیر صحت پنجاب خواجہ سلمان رفیق نے کہا کہ وزیراعلیٰ مریم نواز کے ویژن کے تحت مری اور آس پاس کے علاقوں کے شہریوں کو جدید دل کے علاج کی سہولیات فراہم کی جا رہی ہیں۔ انہوں نے بتایا کہ سید محمد حسین ساملی ہسپتال اور نواز شریف کارڈیالوجی سینٹر میں تیزی سے ترقیاتی کام جاری ہے، جس کی روزانہ بنیاد پر نگرانی کی جا رہی ہے۔
خواجہ سلمان رفیق کے مطابق کیتھ لیب کے قیام کے لیے درکار انسانی وسائل اور طبی آلات ہنگامی بنیادوں پر فراہم کیے جا رہے ہیں تاکہ جلد از جلد عوام کو سہولت میسر آ سکے۔
