(تحریر: نوید انجم فاروقی)
پاکستان اور زمبابوے کے درمیان کھیلی جانے والی ایک روزہ میچوں کی سیریز پاکستان نے 2-1 سے جیت لی۔ محمد رضوان کے کپتان بننے کے بعد پاکستان نے مسلسل دوسری سیریز جیتی ہے۔ اِس سے قبل پاکستان نے آسٹریلیا کو آسٹریلیا میں 2-1 سے شکست دی تھی۔
زمبابوے کے خلاف پہلا میچ بارش کی وجہ سے ہارنے کے بعد پاکستان کرکٹ ٹیم نے دوسرے میچ میں فتح حاصل کر کے سیریز ایک ایک سے برابر کر دی تھی۔ تیسرے میچ میں پاکستان کے کپتان محمد رضوان نے ٹاس جیت کر پہلے بیٹنگ کرنے کا فیصلہ کیا جو درست ثابت ہوا اور ٹیم پاکستان نے زمبابوے کے سامنے 303 رنز کا پہاڑ کھڑا کر دیا جس میں بڑا حصہ کامران غلام کا تھا جنہوں نے جارحانہ بیٹنگ کی اور 99 گیندوں پر دس چوکوں اور چار چھکوں کی مدد سے 103 رنز بنائے، عبداللہ شفیق نے بھی نصف سنچری سکور کی، محمد رضوان نے 37، صائم ایوب نے 31 اور سلمان آغا نے 30 رنز بنائے۔ جواب میں زمبابوے کی پوری ٹیم204 رنز بنا کر آؤٹ ہو گئی۔ 
زمبابوے کی جانب سے اروِن نے نصف سنچری سکور کی۔
پاکستانی کی باؤلنگ بھی شاندار رہی، صائم ایوب، ابرار احمد، حارث رؤف اور عامر جمال نے دو دو وکٹیں حاصل کیں۔ کامران غلام کو شاندار بیٹنگ پر مین آف دی میچ کا ایوارڈ دیا گیا۔صائم ایوب کو سیریز کا بہترین کھلاڑی قرار دیا گیا۔
اِس شاندار کارکردگی کے بعد اَب پاکستان کرکٹ ٹیم کی نظریں زمبابوے کے خلاف تین ٹی ٹونٹی میچوں پر ہیں جن کا آغاز یکم دسمبر سے ہوگا۔ اُس کے بعد ٹیم پاکستان بڑے معرکے کیلئے جنوبی افریقہ روانہ ہو جائے گی۔جہاں وہ دو ٹیسٹ، تین ایک روزہ میچ اور تین ہی ٹی۔20 میچز کھیلے گی، شائقین کرکٹ کو اِس سیریز کا بھی بے صبری سے انتظار ہے۔
