غزہ بتا میں کیا کروں !!

غزہ بتا میں کیا کروں !!

غزہ بتا میں کیا کروں کہ لب ہیں یہ سِلے ہوئے
محافظوں کے دل ترے ہیں خوف سے ہلے ہوئے

غزہ بتا میں کیا کروں !!

غزہ بتا میں کیا کروں شباب بے لگام ہے
وہاں پہ قتل عام تو یہاں پہ رقص وجام ہے

غزہ بتا میں کیا کروں !!

غزہ بتا میں کیا کروں کہ باز ہیں ڈرے ہوئے
خودی جو محوِ خواب تو ہیں حوصلے مرے ہوئے

غزہ بتا میں کیا کروں !!

غزہ بتا میں کیا کروں کہ بازؤوں میں جاں نہیں
دعا مِری جو پَرکٹی تو آنسوؤں میں جاں نہیں

غزہ بتا میں کیا کروں !!

میں ایک جِنسِ بے ضرر !! میں اک صدائے بے اثر
بلال تُو !! اذان تُو !! قُدس کا پاسبان تُو
میں ایک جِنسِ بے ضرر میں اک صدائے بے اثر
میں اک صدائے بے اثر !!
ــــــ
عابی مکھنوی