کراچی ( اسٹاف رپورٹر ) پاکستان پبلشرز اینڈ بک سیلرز ایسو سی ایشن کے تحت کراچی ایکسپو سینٹر میں منعقد ہ کراچی ورلڈ بک فیئر کا آج بروز اتوار چوتھا دن ہے۔ کراچی ورلڈ بک فیئر پوری آب و تاب کے ساتھ جاری ہے۔ تیسرے روز کتابوں سے محبت کرنے ولوں کی بڑی تعداد بک فیئرمیں پہنچ گئی۔ایک محتاط اندازہ کے مطابق کراچی ورلڈ بک فیئر میں گذشتہ روز 2سو زائد اسکولز و کالجزطلبہ سمیت تین(3) لاکھ سے زائد شہریوں نے دورہ کیا۔ بک فیئر کے اسٹال پر بچوں کی کہانیاں ، ناول اور تاریخی کتب پر شہریوںکا زیادہ رش نظر آیا جبکہ سائنس فکشن ، معلومات عامہ اوردیگر کتب بھی خریدی گئیں۔ ورلڈ بک فیئر میںگذشتہ وفاقی وزیرتعلیم و تربیت خالد مقبول صدیقی کے علاوہ اپوزیشن لیڈر علی خورشیدی، ایم این اے احمد سلیم صدیقی، جماعت اسلامی کراچی کے امیر منعم ظفر، منیجنگ ڈائریکٹر نیشنل بک فائونڈیشن ڈاکٹر کامران جہانگیر ، ریجنل ڈائریکٹر فیاض، ادیبہ فاطمہ حسن سمیت ادبی، سماجی، تعلیمی اور مذہبی شخصیات نے دورہ کیا۔ ورلڈ بک فیئر میں ملکی اور غیر ملکی پبلشرز اور بک سیلرزکی جانب سے 329اسٹالز لگائے گئے ہیں ۔ جن میں ملائیشیا، ترکی، مصر ،یو اے ای سمیت 17ممالک کے پبلشرز و بک سیلرز بھی شامل ہیں ۔ ورلڈ بک فیئر 22دسمبر بروز پیر تک جاری رہے گا۔
