بھارت میں بس ڈرائیور کی دوران ڈرائیونگ ’بگ باس 15‘ دیکھنے کی ویڈیو سوشل میڈیا پر وائرل ہوگئی۔
ممبئی سے حیدرآباد رات گئے سفر کے دوران تقریباً 80 کلو میٹر فی گھنٹہ سے رفتار سے گاڑی چلاتے ہوئے فون پر بگ باس 15 دیکھنے کی ویڈیو نے سوشل میڈیا پر غم و غصے کو جنم دیا ہے۔
سوشل میڈیا انفلوئنسر ناگیش مانے نے اسے حادثات کی ایک وجہ قرار دیتے ہوئے شیئر کیا۔
مانے نے ویڈیو شیئر کرتے ہوئے کیپشن میں لکھا کہ بس ڈرائیور کی ویڈیو چند روز قبل ممبئی سے حیدرآباد کے سفر کے دوران ریکارڈ کی گئی تھی۔
سوشل میڈیا صارفین کا کہنا ہے کہ طویل فاصلے پر چلنے والے ڈرائیوروں میں ایسا سلوک عام ہے، ڈرائیور بنیادی طور پر ایسا کرتے ہیں تاکہ خود کو نیند نہ آئے۔
تاہم، ایک صارف نے اسی ٹریول کمپنی کے ساتھ ایک تکلیف دہ ذاتی تجربہ شیئر کیا جس میں الزام لگایا گیا کہ والد کو پچھلے سال خطرناک ڈرائیونگ کے ایک واقعے کی وجہ سے ریڑھ کی ہڈی میں شدید چوٹ آئی تھی۔
وائرل پوسٹ کا جواب دیتے ہوئے،وجیانند ٹریولز نے تفصیلی معافی نامہ جاری کیا اور تصدیق کی کہ ڈرائیور کو ڈیوٹی سے ہٹا دیا گیا ہے۔
ٹریول کمپنی کا کہنا ہے کہ مسافروں کی حفاظت ہماری اولین ترجیح ہے اور اہم اس طرح کے معاملات کو انتہائی سنجیدگی سے لیتے ہیں۔
