پریس ریلیز
کراچی: پاکستان ڈاؤن سنڈروم ایسوسی ایشن (PDSA) کراچی نے سنگاپور کی مایا ڈانس تھیٹر – ڈائیورس ایبیلٹیز ڈانس کلیکٹیو کے وفد کے اعزاز میں ایک پُرمسرت ڈنر کا اہتمام کیا۔ یہ ملاقات آرٹ، ثقافت اور معذوری کی شمولیت کے فروغ کے لیے سرحد پار تعاون کو مضبوط بنانے کے حوالے سے ایک اہم سنگِ میل ثابت ہوئی۔
پاکستان ڈاؤن سنڈروم ایسوسیئشن کے چیف ایگزیکٹو عابد لاشاری، علیشبہ امین الدین (ایمبسڈر PDSA)، اور ڈاکٹر عفت سلطانہ نے معزز مہمانوں کا پُرتپاک استقبال کیا۔ وفد میں کرسٹین وین برم، کویتا، عمران اور دیگر معزز نمائندگان شامل تھے۔
ملاقات کے دوران دونوں فریقین نے پرفارمنگ آرٹس کے کردار پر تفصیلی گفتگو کی کہ کس طرح یہ فنون خاص طور پر افراد باہم ڈاؤن سنڈروم سمیت، معذور افراد کو بااختیار بنانے میں مددگار ثابت ہوتے ہیں۔ دونوں ممالک نے باہمی اتفاق رائے سے مستقبل میں مشترکہ کوششوں پر کام کرنے کا فیصلہ کیا، جن میں شامل ہیں کہ پاکستان اور سنگاپور میں جامع اور شمولیتی پرفارمنگ آرٹس کا فروغ دینا، فنون کے ذریعے بین الثقافتی تبادلوں کی حوصلہ افزائی کرنا، افراد باہم ڈاؤن سنڈروم فنکاروں کی صلاحیتوں میں اضافہ کرنا۔ حقوق کی پرچار، آگاہی اور تخلیقی اظہار کے لیے مشترکہ پلیٹ فارمز کی تشکیل دینا۔ مذکورہ تعاون آرٹ کو شمولیت، نمائندگی اور بااختیاری کے ایک مؤثر ذریعہ کے طور پر استعمال کرنے کے مشترکہ عزم کی عکاسی کرتا ہے۔
پاکستان اور سنگاپور مل کر ایسے جدید راستے بنانے کے خواہاں ہیں جو مختلف صلاحیتوں کا جشن منائیں اور ایک زیادہ جامع اور باہمی تعاون پر مبنی دنیا کی تشکیل میں مددگار ثابت ہوں۔
