بھارتی ریاست گجرات میں ایک ایسا نایاب طبی واقعہ پیش آیا جس نے ڈاکٹروں کو بھی دنگ کر دیا۔
یہ واقعہ امریلی ضلع کے ساورکنڈلا کے ایک ہسپتال میں ہوا، جہاں 66 سالہ گیتابین شدید آنکھوں کی خارش اور درد کے علاج کے لیے پہنچیں۔ معائنے کے دوران ماہرِ چشم ڈاکٹر مرگانک پٹیل نے ان کی پلکوں میں 250 زندہ جوئیں اور 85 انڈے دریافت کیے۔
ڈاکٹر کے مطابق یہ عمل تقریباً دو گھنٹے جاری رہا اور “میکفرسن” نامی خاص آلے سے جوئیں نکالی گئیں۔ چونکہ یہ جوئیں روشنی کے لیے حساس تھیں، اس لیے انہیں نکالنے میں خاص احتیاط برتی گئی اور آنکھوں میں درد یا جلن سے بچانے کے لیے مستقل ڈراپس استعمال کیے گئے۔
ڈاکٹر مرگانک پٹیل نے کہا کہ اپنے 21 سالہ پیشہ ورانہ کیریئر میں یہ پہلا ایسا کیس ہے۔ ان کے مطابق یہ بیماری Phthiriasis Palpebrarum کہلاتی ہے، جو عام طور پر صفائی کی کمی، آلودہ بستر یا تکیے، کمبل یا جانوروں کے قریب رہنے کی وجہ سے لاحق ہوتی ہے۔
ڈاکٹروں کے مطابق جوئیں پلکوں میں شدید خارش، جلن اور سوجن پیدا کرتی ہیں اور بعض اوقات آنکھوں میں چپکنے والا مواد یا سفید ذرات بھی دیکھنے کو ملتے ہیں۔ بروقت علاج نہ ہونے پر انفیکشن بڑھنے کا خطرہ ہوتا ہے۔
خاتون کے علاج کے بعد اگلے دن دوبارہ معائنہ کیا گیا، تو ان کی آنکھیں مکمل طور پر صاف پائی گئیں اور وہ چند ہفتوں بعد سکون سے سو سکیں۔
ڈاکٹروں کا کہنا ہے کہ یہ کیس صفائی اور ذاتی احتیاط کی اہمیت کو اجاگر کرتا ہے، کیونکہ معمولی خارش بھی کبھی کبھار غیر معمولی طبی مسئلے کی نشانی ہو سکتی ہے۔
