پریس ریلیز
این ڈی ایف۔گاوی پروجیکٹ کا ماہانہ جائزہ اجلاس حیدرآباد میں منعقد
حیدرآباد: نیشنل ڈس ایبلٹی اینڈ ڈوالپمنٹ فورم (NDF) پاکستان کی جانب سے این ڈی ایف۔گاوی پروجیکٹ کے تحت “سندھ میں معمول کی حفاظتی ٹیکہ کاری کو بہتر بنانے کے لیے محروم طبقے تک رسائی” کے عنوان سے ماہانہ کارکردگی کا جائزہ اجلاس این ڈی ایف حیدرآباد آفس میں منعقد ہوا۔
اجلاس کی صدارت کرتے ہوئے پروگرام مینیجر این ڈی ایف، طارق حسین چنڑ نے بتایا کہ این ڈی ایف پاکستان اس وقت تعلقہ حیدرآباد دیہی کی دو یونین کونسلز، ھوسڑی اور مسو بھرگڑی میں کام کر رہا ہے۔ اس منصوبے کا مقصد ان بچوں تک رسائی حاصل کرنا ہے جو ابھی تک معمول کی حفاظتی ٹیکہ کاری سے محروم ہیں۔
انہوں نے کہا کہ این ڈی ایف کمیونٹی میں آگاہی سیشنز، سماجی رابطہ مہمات اور گھر گھر وزٹ کے ذریعے والدین کو بروقت ویکسین لگوانے کی ترغیب دے رہا ہے۔ انہوں نے کہا کہ ہمارا مقصد کمیونٹی میں حفاظتی ٹیکہ کاری کی اہمیت کے بارے میں آگاہی بڑھانا اور مطالبہ پیدا کرنا ہے۔”
اجلاس میں خسرہ و روبیلا (Measles-Rubella) مہم جو 17 نومبر سے 30 نومبر تک جاری رہے گی، کے حوالے سے منصوبہ بندی بھی کی گئی۔ ٹیم نے خاص طور پر دور دراز اور محروم علاقوں میں بچوں تک بھرپور رسائی کے لیے حکمت عملی پر مشاورت کی۔
این ڈی ایف نے حکومتی صحت کی کوششوں کے ساتھ مکمل تعاون جاری رکھنے اور اس بات کو یقینی بنانے کے عزم کا اظہار کیا کہ کوئی بھی بچہ جان بچانے والی ویکسین سے محروم نہ رہے۔
