فرانسیسی ٹیک انٹرپرینیور ڈیگوبرٹ رینوف نامی شخص نے اپنی شادی کے اخراجات پورے کرنے کے لیے شادی کے سوٹ کو اشتہاری تختی بنا ڈالا۔
رپورٹس کے مطابق نوجوان معاشی مشکلات کے باعث شادی کے اخراجات برداشت نہیں کر پا رہا تھا، جس کے بعد اس نے اپنی شادی کا سوٹ ایک اشتہاری پلیٹ فارم میں بدلنے کا فیصلہ کیا۔
ڈیگوبرٹ نے سوشل میڈیا پلیٹ فارم ایکس پر ایک پوسٹ کے ذریعے اعلان کیا کہ وہ اپنی جیکٹ پر مختلف کمپنیوں کے اشتہارات لگانے کے لیے جگہ فروخت کر رہا ہے، اور حیران کن طور پر درجنوں اسٹارٹ اپس نے اس پیشکش میں دلچسپی ظاہر کی۔
رپورٹ کے مطابق 26 مختلف کمپنیوں نے اس کی جیکٹ پر اشتہارات دینے کے لیے رقم ادا کی، جس کے نتیجے میں اس نوجوان نے تقریباً 10 ہزار ڈالر جمع کیے۔ یہی رقم اس کی شادی کے تمام اخراجات کے لیے کافی ثابت ہوئی۔
ڈیگوبرٹ نے اپنی شادی کی تقریب میں وہی جیکٹ پہنی، جس پر اسپانسر کمپنیوں کے لوگوز نمایاں تھے۔ تقریب میں موجود مہمانوں نے کہا کہ وہ واقعی ایک چلتا پھرتا بل بورڈ لگ رہا تھا۔
میڈیا میں اس منفرد اقدام نے نہ صرف اسے مشہور کر دیا بلکہ ایک بڑے اسٹارٹ اپ نے اسے اپنی کمپنی میں ملازمت کی پیشکش بھی کر دی۔
ڈیگوبرٹ کا کہنا تھا کہ میں مالی طور پر بالکل خالی تھا، لیکن میں نے سوچا کہ اگر اپنی صلاحیتوں کو ایک منفرد انداز میں پیش کیا جائے تو خواب بھی حقیقت بن سکتے ہیں۔
