بھارت کی ریاست تلنگانہ میں ایک سرکاری اسپتال میں عملے کی سنگین غفلت کے باعث حیران کن واقعہ پیش آیا، جہاں ایک زندہ مریض کو غلطی سے مردہ قرار دے کر مردہ خانے بھیج دیا گیا۔
خوش قسمتی سے بروقت اطلاع ملنے پر مریض کی جان بچ گئی، تاہم اس واقعے نے عوام میں شدید غصے اور بے چینی کی لہر دوڑا دی۔ حکام نے معاملے کی فوری تحقیقات کا حکم دے دیا ہے۔
بھارتی میڈیا کے مطابق یہ واقعہ تلنگانہ کے شہر محبوب آباد کے ایک سرکاری اسپتال میں پیش آیا، جہاں 45 سالہ راجو نامی ٹریکٹر ڈرائیور کو غلطی سے مردہ سمجھ لیا گیا۔ راجو، جو جیارام گاؤں کا رہائشی ہے، کافی عرصے سے ٹانگ کے درد اور گردوں کے مسائل کے باعث اسپتال آتا رہا، لیکن مبینہ طور پر عملے نے اس کا علاج اس لیے نہیں کیا کہ اس کے پاس شناختی کارڈ نہیں تھا اور کوئی تیماردار ساتھ موجود نہیں تھا۔
جمعرات کے روز راجو اسپتال کے مردہ خانے کے قریب بے ہوش ہو کر گر گیا۔ عملے نے بغیر تصدیق کے اسے مردہ قرار دے دیا اور “لاش” کو مردہ خانے میں رکھ کر دروازہ بند کر دیا۔
کچھ دیر بعد صفائی کرنے والے عملے نے اندر سے حرکت محسوس کی تو فوراً اسپتال انتظامیہ کو اطلاع دی۔ پولیس کے پہنچنے پر راجو کو فوری طور پر طبی امداد دی گئی، جس کے بعد اس کی حالت بہتر ہوگئی۔
اسپتال کے میڈیکل آفیسر نے میڈیا کو بتایا کہ واقعے کی اندرونی تحقیقات شروع کر دی گئی ہیں، اور ذمہ داروں کے خلاف سخت کارروائی کی جائے گی۔ انہوں نے مزید کہا کہ آئندہ کسی مریض کو شناخت یا تیماردار کی غیر موجودگی میں علاج سے محروم نہیں رکھا جائے گا۔
