دبئی پولیس نے اپنے نظام میں روبوٹک پروسیس آٹومیشن (RPA) کی بنیاد پر چلنے والے پانچ ورچوئل ملازمین متعارف کرائے ہیں، جو 2019 سے مسلسل اور بغیر کسی وقفے کے ڈیجیٹل اور انتظامی کام انجام دے رہے ہیں۔
رپورٹ کے مطابق ورچوئل ملازمین دبئی پولیس کی ڈیجیٹل حکمت عملی کا حصہ ہیں اور کام کی رفتار بڑھانے، غلطیوں کو کم کرنے اور خدمات کے معیار کو بہتر بنانے میں مدد فراہم کر رہے ہیں۔
میجر جنرل خالد ناصر الرازیقی، ڈائریکٹر جنرل ڈیپارٹمنٹ آف آرٹیفیشل انٹیلی جنس، دبئی پولیس نے کہا کہ یہ اقدام جدید اے آئی ٹیکنالوجیز میں سرمایہ کاری کے عزم کو ظاہر کرتا ہے تاکہ کمیونٹی کو بہترین خدمات فراہم کی جا سکیں۔
حسہ البلوشی، ڈائریکٹر اسمارٹ ایپلیکیشنز ڈیپارٹمنٹ، نے کہا کہ یہ ورچوئل ملازمین آٹھ اہم محکموں میں کام کر رہے ہیں، جن میں فنانس، ہیومن ریسورسز، ایئرپورٹ سیکیورٹی اور اداروں کی حفاظت شامل ہیں۔
دبئی پولیس کے مطابق یہ اقدامات شہر کو دنیا کے سب سے محفوظ اور اسمارٹ شہروں میں شامل کرنے کے لیے کیے جا رہے ہیں، اور آرٹیفیشل انٹیلی جنس کے ذریعے کارکردگی اور وقت کی بچت کو یقینی بنایا جا رہا ہے۔
