دنیا کے سب سے بڑے اور قیمتی مریخی شہابیے کو نیویارک میں 4.3 ملین ڈالر میں نیلام کر دیا گیا۔
امریکی میڈیا رپورٹس کے مطابق، 24.5 کلوگرام وزنی یہ شہابیہ — جس کا نام
NWA 16788
ہے — نیلامی کے معروف ادارے سوتھبیز کے ذریعے فروخت کیا گیا۔ اس کی کل وزن تقریباً 54 پاؤنڈ تھی، جو اسے مریخ سے زمین پر آنے والے سب سے بڑے شہابیوں میں شمار کرتی ہے۔
یہ نایاب خلائی پتھر سب سے پہلے 2023 میں افریقی ملک نائجر کے دور افتادہ علاقے اگادیز میں دریافت ہوا تھا۔
دنیا بھر میں اب تک تقریباً 77 ہزار شہابیے دریافت ہو چکے ہیں، لیکن ان میں سے صرف 400 ہی ایسے ہیں جن کا تعلق مریخ سے ثابت ہو چکا ہے — اور ان میں بھی یہ شہابیہ اپنی ساخت اور سائز کی وجہ سے غیر معمولی اہمیت رکھتا ہے۔
ماہرین کے مطابق یہ شہابیہ اولیون مائکروگابروِک شیرگوٹائٹ نوعیت کی چٹان پر مشتمل ہے، جو مریخ کے آتش فشانی میگما کے آہستہ ٹھنڈا ہونے کے نتیجے میں تشکیل پائی۔ اس میں پائروکسین اور اولیوین جیسے اہم معدنی اجزاء شامل ہیں۔
اس کی سطح شیشے جیسی چمکدار ہے، جو اس بات کا ثبوت ہے کہ یہ فضا میں داخل ہوتے ہوئے شدید حرارت سے گزرا۔
سائنسدانوں کے لیے یہ شہابیہ انتہائی قیمتی ہے کیونکہ اس سے مریخ کی ارضیاتی تاریخ، معدنی ساخت اور آتش فشانی سرگرمیوں کے بارے میں نادر معلومات حاصل کی جا سکتی ہیں۔
