کرکٹ کے منچلوں نے بحری جہاز پر بھی اپنا شوق پورا کرلیا

عام طور پر کرکٹ کھلے میدان میں کھیلا جاتا ہے تاکہ بیٹرز اور بولرز بھرپور طریقے سے اپنی صلاحیتوں کا مظاہرہ کرسکیں اور ساتھ لطف اندوز بھی ہوسکیں لیکن اس کھیل کا شوق لوگوں کو کہیں بھی بیٹ اور گیند پکڑ کر کھیلنے پر مجبور کر دیتا ہے۔

چند کرکٹ کے دیوانے سمندر کے بیچوں بیچ بحری جہاز پر اپنے شوق پر کنٹرول نہ رکھ سکے اور انہوں نے کرکٹ کھیلنے کا فیصلہ کیا۔

ان کرکٹ کے دیوانوں کے لیے میدان تو کھلا تھا پر یہ میدان زمین پر نہیں بلکہ سمندر کے اوپر تھا اور ان کرکٹ کھیلنے والوں کے پاس گیند بھی ایک تھی اور اگر یہ واحد گیند سمندر میں چلی جاتی تو بحری جہاز تو چلتا رہتا اور سمندر میں کود کر گیند پکڑنے کے لیے فیلڈنگ کون کرتا تو شاید یہی سوچتے ہوئے ان کرکٹ کھیلنے والوں کے دماغ میں ضرورت ایجاد کی ماں ہے والی بات آئی۔

بحری جہاز پر کرکٹ کھیلنے والوں نے حالات کی مجبوری اور اپنے شوق کو پورا کرنے کے لیے گیند کو ایک ڈور سے باندھ دیا جس کے باعث اونچا شاٹ کھیلنے کے بعد گیند پانی میں جاتی بھی تو اسے دوبارہ بحری جہاز پر لے آیا جاتا۔
سوشل میڈیا پر اس کرکٹ میچ کی ویڈیو پر دلچسپ تبصروں کا سلسلہ جاری ہے۔