ایئر انڈیا کی بزنس کلاس فلائٹ میں سفر کرنے والی بھارتی فوڈ ولاگر پاویترا کور نے اپنے تجربے پر شدید مایوسی کا اظہار کیا ہے۔
فوڈ ولاگر نے نئی دہلی سے سان فرانسسکو جانے والی ایئر انڈیا کی فلائٹ میں سفر کے لیے تقریباً 4 لاکھ روپے خرچ کیے مگر ان کے مطابق سہولتیں اور صفائی اِن کے معیار پر پوری نہیں اتریں۔
پاویترا کور نے یوٹیوب پر شیئر کیے گئے اپنے نئے ولاگ میں بتایا کہ وہ اس بزنس کلاس کے تجربے کو 10 میں سے صرف 6 نمبر دیں گی، پہلی نشست میں تکنیکی خرابی تھی جس کے بعد اِنہیں دوسری سیٹ دی گئی، مگر وہاں بھی وہی مسئلہ موجود تھا۔
ایئرانڈیا کی فلائٹ میں مسائل پر ناراضی کا اظہار کرتے ہوئے انہوں نے کہا کہ اتنی بڑی رقم ادا کرنے کے باوجود بنیادی سہولتیں فراہم نہیں کی گئیں۔
صفائی کے معاملے پر بھی ولاگر نے سخت تنقید کی، اُنہوں نے سوال اٹھایا کہ بزنس کلاس میں بھی اگر صفائی کا یہ حال ہے تو پھر عام مسافروں کا اکانومی کلاس میں کیا حال ہوگا؟
بھارتی فوڈ ولاگر نے اپنے ولاگ میں دعویٰ کیا کہ ان کی سیٹ پر دو مردہ مکھیاں موجود تھیں، پھل اور کھانا بھی باسی دیا گیا جبکہ پلیٹ میں بھی مکھیاں نظر آئیں، میٹھا اِن کے لیے سب سے بڑی مایوسی ثابت ہوا یہاں تک کہ انہوں نے میٹھا کھایا تک نہیں۔
ان کے مطابق چاکلیٹ موز بہت خراب تھا اور پھل بھی باسی تھے۔
آخر میں بلاگر نے طنزیہ انداز میں کہا کہ ’لیکن یہ ایئر انڈیا ہے‘، ان کے پاس کوئی اور آپشن نہیں تھا اس لیے اُنہوں نے اسی فلائٹ کا انتخاب کیا۔
