جدہ ( امیر محمد خانُُ سے)
جدہُ میں پاکستان کے نئے قونصل جنرل سید مصطفیٰ ربانی 30 نومبر کو جدہ پہنچ رہے ہیں جہاں وہ اپنی ذمہ داریاں سنبھالیں گے۔ واضح رہے کہ مصطفیٰ ربانی کا شمار پاکستان کی وزارت خارجہ کے محنتی افسران میں ہوتا ہے۔ وہ وزارت خارجہ میں اہم عہدوں پر فائز رہے ہیں۔ 1999 میں پشاور یونیورسٹی سے فارغ التحصیل ہونے کے بعد مصطفیٰ ربانی وزارت خارجہ میں شامل ہونے سے قبل ابتدائی طور پر پشاور میں ایک پرائیویٹ لاء فرم سے منسلک تھے۔ بعد ازاں، انہوں نے 2001-2002 تک پشاور یونیورسٹی میں قانون کی فیکلٹی میں ریسرچ کوآرڈینیٹر کے طور پر خدمات انجام دیں۔مصطفیٰ ربانی نے 2002 میں سول سروس آف پاکستان میں شمولیت اختیار کی، اور سول سروس اکیڈمی، لاہور میں اپنی تربیت مکمل کرنے کے بعد، اسسٹنٹ اکاؤنٹنٹ جنرل، خیبر پختونخوا کے طور پر خدمات انجام دیں۔انہوں نے جنوری 2005 میں پاکستان کی فارن سروس میں شمولیت اختیار کی، جہاں انہوں نے اپنی اعلیٰ کارکردگی کی وجہ سے وزارت خارجہ میں اسسٹنٹ ڈائریکٹر (فنانس) کے طور پر اپنے سفارتی کیریئر کا آغاز کیا۔ بعد ازاں وہ کثیر الجہتی امور اور اقوام متحدہ کے نظام سے بطور اسسٹنٹ ڈائریکٹر (اقوام متحدہ ڈویژن) وابستہ رہے۔ مصطفیٰ ربانی کی بیرون ملک پہلی پوسٹنگ تہران، ایران میں اقتصادی تعاون تنظیم (ای سی او) کے ساتھ ہوئی جہاں انہوں نے 2007 سے 2009 تک اسسٹنٹ ڈائریکٹر (بین الاقوامی تعلقات) کے طور پر خدمات انجام دیں۔ 2012 سے 2016 تک انہوں نے لندن میں پاکستانی ہائی کمیشن میں فرسٹ سیکرٹری کے طور پر خدمات انجام دیں۔
اسلام ٓباد واپسی پر انہوں نے ڈپٹی چیف آف پروٹوکول خیبر پختونخواہ (2016-2017)، ڈائریکٹر فارن سیکرٹری آفس (2017-2018) اور ڈائریکٹر فارن منسٹر آفس (2018-2021) کے طور پر خدمات انجام دیں۔جدہ آمد سے قبل وہ 2021 سے 2025 تک قطر کے شہر دوحہ میں ڈپٹی ہیڈ آف مشن اور وزیر (سیاسی اور قونصلر امور) کے طور پر خدمات انجام دے رہے تھے۔ جدہ، مکہ، ینبو، قصیم، الطائف، مدینہ المنورہ اور مغربی صوبے میں مقیم پاکستانیوں نے ایک محنتی سفارتکار کی تعیناتی پر خوشی کا اظہار کیاہے اور امید کہ ہے وہ اپنے پیش رو قونصل جنرل کے مثبت کاموں کو آگے مزید آگے بڑھاتے ہوئے پاکستانیوں کے سر فخر سے بلند کرینگے،قونصل جنرل پاک سعودی تجارت کے فروغ اورپاکستانی کلچر کو سعودی عرب میں مثبت شناخت دینے میں اپنا کردار ا دا کرینگے پاکستان کمیونٹی ہمیشہ کی طرح قونصل جنرل مثبت کاموں میں شانہ پشانہ ہونگیں۔
