کراچی میں دو دن میں دوبار ایک ہی مقام پرچوری کی انوکھی واردات سامنے آئی ہے،سندھ کے معروف ادیب،گلوکاراورسابق سینئرپروڈیوسربیدل مسرور کےگھر سے گھی کے ڈبوں میں چھپائے گئے ستر لاکھ روپے غائب ہوگئے۔
بیدل مسرور نےسماکو بتایا کہ ان کی اہلیہ بیمارتھیں اور علاج کے لیے اُنھوں نےاپنا ایک پلاٹ فروخت کیا تھا، رقم کو محفوظ سمجھتے ہوئے انھوں نےاسےگھی کےدوڈبوں میں چھپاکرکمرے میں رکھا تھا،جس شام وہ اپنے بیٹےکاتحریرکردہ ڈرامہ آرٹس کونسل میں دیکھنےگئے،اس ہی روز پہلی واردات ہوئی اور ڈبے سے تیس لاکھ روپے غائب تھے،اگلے دن جب بیدل مسرور ایف آئی آر درج کرانے گئے تو واپس آ کر دیکھا کہ دوسرا ڈبہ بھی غائب تھا۔
بیدل مسرور کےمطابق چور کھڑکی کی جالی کاٹ کرکمرے میں داخل ہوئے،چور نےمکمل منصوبہ بندی کے بعد واردات انجام دی،پولیس کے مطابق واردات کا مقدمہ سچل تھانے میں درج ہے، بارہ اور تیرہ نومبر کی درمیانی شب ہونے والی واردات کی مکمل تحقیقات جاری ہیں۔
