وفاقی وزیر مصدک ملک کی زیرصدارت سیٹس اجلاس
اسلام آباد: وفاقی وزیر برائے موسمیاتی تبدیلی و ماحولیاتی ہم آہنگی سینیٹر ڈاکٹر مصدک ملک نے سیٹس مینجمنٹ اتھارٹی آف پاکستان کے اجلاس کی صدارت کرتے ہوئے 2025-26 کے ٹرافی ہنٹنگ کوٹاز کے تعین اور جائزے کے امور پر غور کیا۔
وزیر نے ہدایت کی کہ کوٹاز کی منظوری عالمی سیٹس اصولوں کے مطابق دی جائے اور کسی بھی جانور کی مجموعی آبادی کے 2 فیصد سے زائد حصہ ٹرافی ہنٹنگ کے لیے مختص نہ کیا جائے۔ انہوں نے واضح کیا کہ تمام فیصلے باقاعدہ اور سائنسی بنیادوں پر تیار کی گئی آبادیاتی رپورٹس کی روشنی میں ہی کیے جائیں تاکہ پاکستان کے جنگلی حیات کے تحفظ کو طویل المدتی طور پر مستحکم بنایا جا سکے۔
اجلاس میں اس بات پر بھی زور دیا گیا کہ صرف تعداد ہی نہیں بلکہ مختلف علاقوں میں موجود انواع کی معاشرتی ساخت، جھنڈ کی ترتیب اور غلبہ رکھنے والے نر جانوروں کے کردار کا جائزہ لینا بھی ضروری ہے۔
ڈاکٹر مصدک ملک نے نشاندہی کی کہ غالب نر جانوروں یا افزائش کے گروہوں میں غیر ضروری مداخلت افزائش، پھیلاؤ اور مجموعی آبادی میں عدم توازن پیدا کر سکتی ہے، اس لیے سائنسی بنیادوں پر بہترین اور ذمہ دارانہ ٹرافی ہنٹنگ طریقہ کار وضع کیے جائیں۔
وزیر نے صوبائی وائلڈ لائف محکموں کے ساتھ مشترکہ تحقیقاتی منصوبہ تیار کرنے کی ہدایت دیتے ہوئے کہا کہ یہ منصوبہ آبادی کے سائنسی جائزے کے ساتھ ساتھ معاشرتی ڈھانچے اور جھنڈ کے رویوں کا بھی احاطہ کرے گا۔ اجلاس میں ہدایت کی گئی کہ تازہ ترین وائلڈ لائف سروے کا تجزیاتی ڈیٹا دو روز کے اندر جمع کرایا جائے، جبکہ جن صوبوں نے رواں سال کے سروے جمع نہیں کرائے وہ عارضی طور پر گزشتہ سال کے کوٹے پر ہی برقرار رہیں گے۔
ڈاکٹر مصدک ملک نے آئندہ سال سے سخت پالیسی کا اعلان کرتے ہوئے کہا کہ جو صوبے سالانہ آبادیاتی سروے جمع نہیں کرائیں گے، انہیں کسی قسم کا ٹرافی ہنٹنگ کوٹا نہیں دیا جائے گا۔ وفاقی حکومت نے اس فیصلے کو تحفظِ ماحول اور عالمی معیارات سے مکمل ہم آہنگ قرار دیتے ہوئے کہا کہ جنگلی حیات کے تحفظ میں کوئی سمجھوتہ نہیں ہوگا۔
اجلاس میں پنجاب، خیبرپختونخوا، سندھ، بلوچستان، آزاد جموں و کشمیر، گلگت بلتستان کے وائلڈ لائف و فاریسٹ محکموں اور زولوجیکل سروے آف پاکستان کے نمائندوں نے شرکت کی۔
===============================
سوزوکی نے پاکستان میں نئی گاڑی فرونکس متعارف کرا دی
معروف آٹو موبائل کمپنی سوزوکی نے پاکستان میں اپنی سب سے بڑی اور مہنگی گاڑی سوزوکی فرونکس متعارف کرا دی۔
کراچی: معروف آٹو موبائل کمپنی سوزوکی نے پاکستان میں اپنی سب سے بڑی اور مہنگی گاڑی سوزوکی فرونکس متعارف کرا دی۔
کراچی میں سوزوکی کی نئی کمپیکٹ ایس یو وی فرونکس کی تقریب رونمائی منعقد ہوئی، جس نے خریداروں میں ایک نئی دلچسپی پیدا کر دی، وٹیارا کو مارکیٹ میں مشکلات کا سامنا رہا تھا لیکن اب کمپنی اس بولڈ لانچ کے ساتھ مضبوط واپسی کے لیے تیار دکھائی دیتی ہے۔
لوکل اسمبلی کی حکمتِ عملی
فرونکس، سوزوکی کی اب تک کی سب سے بڑی اور مہنگی گاڑی ہے، یہ کمپنی کی پہلی لوکل اسمبلڈ ایس یو وی بھی ہے، کمپنی کی جانب سے یہ فیصلہ درآمدی وٹیارا کے مسائل کو حل کرنا ہے، جسے زیادہ قیمت اور اسپیئر پارٹس کی کمی کا سامنا تھا۔
اب کمپنی کا ہدف ہے کہ پاکستان کے اندر اسمبلی کے ذریعے بہتر قیمت، زیادہ سہولت اور کم خرچہ مرمت کی سہولت فراہم کرے۔
سوزوکی کمپنی مقامی طور پر اسمبلی کے ذریعے دوبارہ مارکیٹ کا اعتماد حاصل کرنے کے لیے کوشاں ہے، فرونکس گاڑی کی خصوصیات جدید اور عملی دکھائی دیتی ہیں جو خریدار وں کی دلچسپی کو بڑھا رہی ہیں لیکن گاڑی کی حتمی قیمت ہی اس کا مستقبل طے کرے گی۔
ماہرین کا کہنا ہے کہ مارکیٹ میں پہلے ہی مضبوط مقابلے موجود ہیں، اس لیے سوزوکی کو محتاط رہنا ہو گا، فی الحال لوگ اس گاڑی کا بے چینی سے انتظار کر رہے ہیں۔
مارکیٹ مقابلہ
سوزوکی فرونکس مارکیٹ میں مقابلے کیلئے تیار ہے، جہاں اس کا براہِ راست مقابلہ ہونڈا ایچ آر وی، کیا سٹونک اور ٹویوٹا کرولا کراس سے ہو گا۔
اگرچہ سوزوکی نے تاحال فرونکس کی قیمت ظاہر نہیں کی، مگر ابتدائی اسپیکس اور خصوصی تصاویر نے خریداروں میں بے چینی اور تجسس بڑھا دیا ہے۔
اسپیکس اور خصوصیات کی تفصیل
• سائز: 3995 x 1765 x 1550 ملی میٹر
• وہیل بیس: 2520 ملی میٹر
• انجن: 1.5 لیٹر
• آؤٹ پٹ: 103 ہارس پاور، 138 این ایم ٹارک
• گیئر باکس: 4-اسپیڈ آٹومیٹک
• فیول ٹینک: 37 لیٹر
• لگج کیپیسٹی (سیٹس فولڈ کرنے پر): 605 لیٹر
• 16 انچ الائے رمز
اندرونی فیچرز اور سیکیورٹی
• 9 انچ ٹچ اسکرین (اینڈرائیڈ آٹو، ایپل کار پلے)
• ڈیجیٹل کلائمٹ کنٹرول
• ریئر اے سی وینٹس
• وائرلیس چارجر
• اسٹیئرنگ کنٹرول
• کی لیس انٹری
• پنش اسٹارٹ
• ریئر یو ایس بی پورٹس
• سیکیورٹی فیچرز میں شامل ہیں:
• چھ ایئر بیگز
• اے بی ایس
• وہیکل اسٹیبلٹی اسسٹ
• ہِل ہولڈ کنٹرول
• 360 ڈگری کیمرا
• پارکنگ سینسرز
