چین کے بیجنگ میں واقع شینزین کی بایوسائنس اسٹارٹ اپ لونوی کے سائنسدانوں نے ایک ایسی گولی تیار کرنے کا دعویٰ کیا ہے جو انسانی زندگی کو 150 سال تک بڑھا سکتی ہے۔
سائنسدانوں کے مطابق انسانی صحت اور عمر میں اضافہ کرنے والی اس گولی کا اہم جزو PCC1 ہے، جو انگور کے بیجوں سے حاصل ہونے والا مالیکیول ہے۔
تحقیق کے مطابق لیبارٹری میں کئے گئے تجربات میں یہ دیکھا گیا کہ یہ جزو عمر رسیدہ خلیوں کو دوبارہ فعال کر سکتا ہے اور سوزش کو کم کرتا ہے۔ ابتدائی تجربات چوہوں پر کئے گئے، جہاں اس گولی نے چوہوں کی اوسط عمر میں تقریباً 9.4 فیصد اضافہ کیا، اور طویل مدتی نتائج میں 64.2 فیصد بہتری دیکھنے کو ملی۔
لونوی بایوسائنسز کے مطابق یہ گولی نہ صرف عمر کو بڑھا سکتی ہے بلکہ عمر رسیدگی سے منسلک بیماریوں جیسے دل کی بیماری، ذیابیطس اور دیگر مسائل کو کم کرنے میں بھی مددگار ثابت ہو سکتی ہے، اگر یہ انسانی تجربات میں بھی کامیاب ہوئی، تو چین میں موجودہ اوسط متوقع عمر 79 سال کو بڑے پیمانے پر بڑھایا جا سکتا ہے۔
سائنسدان اس دریافت کو انسانی زندگی کے نئے دور کی شروعات قرار دے رہے ہیں، تاہم ماہرین نے خبردار کیا ہے کہ ابھی اس گولی کی حفاظت اور اثرات پر مزید تحقیق کی ضرورت ہے۔
