بھارتی ریاست مہاراشٹر میں لڑکی نے قتل ہونے والے عاشق کی لاش سے شادی کر کے سب کو حیران کر دیا۔
انڈین میڈیا کے مطابق ناندیڑ میں محبت کرنے والے جوڑے کی زندگی ایک المناک موڑ پر اُس وقت پہنچی جب لڑکی کے اہل خانہ نے رشتے کی مخالفت میں اس کے عاشق کو بے دردی سے قتل کیا۔
واقعے کے بعد انچل نامی لڑکی اپنے مقتول کے گھر پہنچی اور آخری رسومات سے کچھ دیر قبل اپنے ماتھے پر سندور لگا کر خود کو اس کی دلہن بنا لیا۔
افسوسناک واقعہ ناندیڑ شہر کے پرانے گنج علاقے میں پیش آیا۔ لڑکی کے والد اس رشتے کے شدید مخالف تھے، انہوں نے اپنے ایک ساتھی کے ہمراہ سکشم نامی لڑکے کو بے دردی سے قتل کیا۔
ملزم نے سکشم کے سر میں گولی ماری، مقتول لڑکی کے بھائی کا قریبی دوست تھا۔
پولیس نے چند گھنٹوں کے اندر ملزم اور اس کے ایک ساتھی کو گرفتار کر لیا۔ پولیس کے مطابق قتل سے تقریباً دو گھنٹے پہلے لڑکی کی ماں جے شری مرنے والے کے گھر گئی تھیں اور اسے دھمکیاں دی تھیں۔ سکشم اور ملزم دونوں کا مجرمانہ پس منظر ہے اور مقتول حال ہی میں جیل سے رہا ہوا تھا۔
انچل نے بتایا کہ میں گزشتہ تین سال سے سکشم کے ساتھ رشتے میں تھی، میری فیملی اس رشتے کے خلاف تھی اور جیل سے رہائی کے بعد سے وہ اس کے قتل کی سازش کر رہے تھے۔
اس کا مزید کہنا تھا کہ اگرچہ سکشم اب اس دنیا میں نہیں رہا لیکن میں زندگی بھر اس کی بیوی ہی رہوں گی۔
