واٹس ایپ اپنی سیکیورٹی اور صارفین کی نجی معلومات کے تحفظ کو مزید بہتر بنانے کے لیے نئے پرائیویسی فیچرز متعارف کرانے کی تیاری کر رہا ہے۔
آنے والا فیچر صارفین کو اس بات پر زیادہ کنٹرول فراہم کرے گا کہ کون انھیں پیغام بھیج سکتا ہے اور پیغامات ان کی چیٹ میں کیسے ظاہر ہوں گے۔
میٹا کی زیرِ ملکیت کمپنی نے تازہ ترین اینڈرائیڈ بیٹا اپ ڈیٹ میں ایک نیا فیچر جاری کیا ہے جس کے ذریعے صارفین اپنے فون نمبر کی بہ جائے منفرد یوزر نیم کے ذریعے ایک دوسرے سے رابطہ کر سکیں گے۔ اس طرح وہ بغیر اپنی ذاتی معلومات ظاہر کیے کالز اور چیٹس کر سکیں گے۔
یہ نمایاں تبدیلی واٹس ایپ کی جانب سے صارفین کی پرائیویسی بڑھانے اور غیر مطلوب پیغامات یا کالز کی روک تھام کے لیے کی جا رہی ہے۔
ورژن 2.25.33.11 میں دیکھی گئی ایک نئی اپ ڈیٹ کے تحت واٹس ایپ میں Who can message me کے نام سے ایک نیا سیٹنگ آپشن شامل کیا جا رہا ہے۔ اس میں صارفین کو دو اختیارات دیے گئے ہیں:
Everyone (سب لوگ) — اس آپشن کے تحت تمام نئے پیغامات براہِ راست چیٹ میں ظاہر ہوں گے۔
My Contacts (میرے رابطے) — اس کے انتخاب پر نامعلوم نمبروں سے آنے والے میسیجز نئے ’Requests Folder‘ میں چلے جائیں گے۔
یہ نظام انسٹاگرام کے Message Requests فیچر سے مشابہ ہے، جس میں صارفین کسی پیغام کو پڑھنے، حذف کرنے، بھیجنے والے کو بلاک کرنے یا جواب دینے کا فیصلہ کر سکتے ہیں۔
فائدے اور سیکیورٹی پہلو
ریکوئسٹس فولڈر چیٹس کو منظم رکھنے، اسپیم کو کم کرنے اور بالخصوص نوجوان صارفین کے لیے سیکیورٹی کو بہتر بنانے میں مددگار ہوگا۔ ابتدائی طور پر یہ تمام نئے فیچرز بیٹا ٹیسٹرز کے لیے دستیاب ہوں گے۔ اس کے بعد انھیں مرحلہ وار گوگل پلے اسٹور پر تمام صارفین کے لیے جاری کیا جائے گا۔
