ٹاون کمیٹی میرواہ گورچانی کے مختلف وارڈز میں خواتین کے ووٹ کم درج ہونے کے حوالے سے ڈسٹرکٹ الیکشن کمشنر میرپورخاص خالد حسین لنڈ کی ٹاؤن کمیٹی میرواہ گورچانی کے وائیس چیئرمین ہیرالال میگھواڑ سے ایک اہم ملاقات ہوئی

میرپورخاص
رپورٹ
تحسین احمد خان
ٹاون کمیٹی میرواہ گورچانی کے مختلف وارڈز میں خواتین کے ووٹ کم درج ہونے کے حوالے سے ڈسٹرکٹ الیکشن کمشنر میرپورخاص خالد حسین لنڈ کی ٹاؤن کمیٹی میرواہ گورچانی کے وائیس چیئرمین ہیرالال میگھواڑ سے ایک اہم ملاقات ہوئی۔ملاقات کے دوران وائیس چیئرمین ہیرالال میگھواڑ نے الیکشن کمشنر کو بتایا کہ کئی وارڈز کے ووٹ غلطی سے دوسرے وارڈز یا دوسری یونین کونسلوں میں درج ہوگئے ہیں جنہیں درست کرانے کے لیے اقدامات کیے جانے چاہییں۔اس پر ڈسٹرکٹ الیکشن کمشنر خالد حسین لنڈ نے خاص طور پر خواتین کے ووٹ درج کرانے پر زور دیا اور کہا کہ ہر ایسی خاتون جس کے پاس قومی شناختی کارڈ ہے وہ ضرور اپنا ووٹ درج کرائے۔جن افراد کے نام غلطی سے دوسرے وارڈز یا یونین کونسلوں میں شامل ہوگئے ہیں وہ الیکشن کمیشن کی ویب سائٹ سے فارم نمبر 21 ڈاؤن لوڈ کر کے یا الیکشن کمیشن کے دفتر میرپورخاص سے حاصل کر کے اپنے ووٹ کو درست کروا سکتے ہیں۔انہوں نے مزید بتایا کہ خواتین کے شناختی کارڈ بنانے کے لیے نادرا کی موبائل وین دو روز کے لیے ٹاؤن کمیٹی میرواہ گورچانی کے دفتر میں صبح 9 بجے سے شام 4 بجے تک موجود رہے گی جہاں 18 سال سے زائد عمر کے مرد و خواتین کے نئے شناختی کارڈ بنائے جائیں گے۔ انہوں نے کہا کہ ضلع میرپورخاص میں مرد ووٹرز کی تعداد 480932 اور خواتین ووٹرز کی تعداد 423606 ہے جبکہ کل ووٹرز کی تعداد 904538 ہے جن میں خواتین ووٹرز کا اندراج بہت کم ہے انہوں نے شہریوں سے اپیل کی ہے کہ وہ اپنے ووٹوں کا اندراج کروا کر ذمہ داری شہری ہونے کا ثبوت دیں-