بالی ووڈ کے معروف ’بھائی جان‘ سلمان خان عام طور پر فلم کے سیٹ پر دیر سے پہنچنے کے لیے مشہور ہیں، مگر اب وہ اس رویے کو بدلنے کی بھرپور کوشش کر رہے ہیں۔
بھارتی میڈیا کے مطابق، فلم سے منسلک سلمان خان کے ایک قریبی ذرائع کا کہنا ہے کہ وہ اپنی نئی فلم ’بیٹل آف گلوان‘ میں بہترین پرفارمنس دینے کے لیے کوئی کسر نہیں چھوڑنا چاہتے۔
ممبئی کے فلم سٹی گورے گاؤں میں فلم کے دوسرے شیڈول کے لیے ایک بڑا سیٹ تیار کیا گیا ہے۔ چونکہ سلمان خان باندرہ میں رہائش پذیر ہیں اور ممبئی کا ٹریفک بدنام ہے، ایک دن وہ کئی گھنٹے ٹریفک میں پھنس گئے۔ تاہم وقت پر سیٹ پہنچنے کے لیے سلمان نے اپنی گاڑی چھوڑ دی اور قریبی بچوں کی بائیک پر سواری اختیار کی۔
ذرائع کے مطابق، سلمان کے باڈی گارڈز اور اسٹاف بھی ان کے پیچھے بائیکس پر موجود تھے تاکہ وہ محفوظ رہیں۔
سلمان نے اپنی شناخت چھپانے کے لیے چہرہ ڈھانپا ہوا تھا، لیکن بعد میں جب بچوں کو معلوم ہوا کہ یہ شخص فلم سٹی سے انہیں چھوڑ کر گیا تھا، تو وہ خوشی سے جھوم اٹھے۔
مزید یہ کہ فلم کے دوسرے شیڈول میں چترنگدا سنگھ بھی ممبئی میں شامل ہوں گی۔
