بھارتی گلوکار لکی علی نے معروف نغمہ نگار اور مصنف جاوید اختر کے حالیہ متنازع بیان پر سخت ردِعمل دیتے ہوئے انہیں تنقید کا نشانہ بنایا ہے۔
بھارتی میڈیا رپورٹس کے مطابق، چند روز قبل جاوید اختر کی ایک ویڈیو وائرل ہوئی تھی جس میں وہ فلم “شعلے” کے حوالے سے مذہبی رجحانات پر گفتگو کر رہے تھے۔ ویڈیو میں جاوید اختر نے کہا کہ شعلے کی ریلیز کے وقت لوگ (ہندو) آج کی طرح مذہبی نہیں تھے، اور اب اس نوعیت کے مکالمے لکھنا ممکن نہیں رہا۔
اسی گفتگو کے دوران جاوید اختر نے ایک تقریب کا حوالہ دیتے ہوئے کہا:
“میں نے راجو ہیرانی سے کہا تھا کہ مسلمانوں کی طرح مت بنو، بلکہ انہیں اپنے جیسا بناؤ، المیہ یہ ہے کہ تم ان جیسے بن رہے ہو۔”
ان کے اس بیان نے سوشل میڈیا پر شدید ردِعمل پیدا کیا، جہاں صارفین نے انہیں تنقید کا نشانہ بنایا۔ اسی موقع پر لکی علی نے بھی ایکس (سابق ٹوئٹر) پر جاوید اختر کو مخاطب کرتے ہوئے لکھا:
“جاوید اختر جیسے مت بنو۔”
انہوں نے مزید انہیں “بدتمیز” اور “بدصورت” قرار دیا۔
بعد ازاں لکی علی نے اپنے بیان کی وضاحت کرتے ہوئے کہا کہ ان کا مطلب یہ تھا کہ تکبر انسان کو بدصورت بنا دیتا ہے۔ طنزیہ انداز میں انہوں نے مزید لکھا:
“اگر کسی شیطان کے جذبات مجروح ہوئے ہوں تو میں معذرت خواہ ہوں، کیونکہ شیطانوں کے بھی شاید احساسات ہوتے ہیں۔”
لکی علی کا یہ بیان سوشل میڈیا پر تیزی سے وائرل ہوگیا ہے، اور جاوید اختر کے ناقدین گلوکار کے مؤقف کی حمایت کرتے ہوئے مصنف پر شدید تنقید کر رہے ہیں۔
