رمضان المبارک کی آمد سے متعلق ابتدائی فلکیاتی پیشگوئی سامنے آ گئی ہے، جب کہ ماہِ جمادی الاول کے چاند کی رویت کے بارے میں بھی ماہرینِ فلکیات نے اندازہ پیش کر دیا ہے۔
تفصیلات کے مطابق ماہِ رمضان المبارک کے آغاز میں اب تقریباً تین ماہ سے کچھ زائد عرصہ باقی ہے۔ امارات فلکیاتی انجمن کے مطابق نیا ہجری سال 1477 ہجری کا پہلا روزہ جمعرات 19 فروری 2026 کو ہونے کا امکان ہے۔
انجمن کے صدر ابراہیم جروان کا کہنا ہے کہ رمضان 1447 ہجری کا چاند منگل 17 فروری کی شام 4 بج کر ایک منٹ پر (امارات کے وقت کے مطابق) پیدا ہوگا، جو سعودی وقت کے مطابق 3 بج کر ایک منٹ بنتا ہے۔ ان کے مطابق سورج غروب ہونے کے فوراً بعد چاند محض ایک منٹ کے اندر غائب ہو جائے گا، جبکہ غروبِ آفتاب کے وقت اس کی عمر صرف 2 گھنٹے اور 12 منٹ ہوگی، اسی لیے اس روز ہلال نظر آنے کے امکانات نہایت کم ہیں۔
فلکیاتی ماہرین کے مطابق انہی شواہد کی بنیاد پر جمعرات 19 فروری 2026 کو پہلا روزہ ہونے کا قوی امکان ہے۔ مزید یہ کہ رواں برس رمضان کے 29 روزے ہوں گے اور عید الفطر 20 مارچ بروز جمعہ کو متوقع ہے۔
دوسری جانب ماہِ جمادی الاول 1447 ہجری کے چاند کے بارے میں سپیس اینڈ اپر ایٹموسفیر ریسرچ کمیشن (سپارکو) نے بھی پیشن گوئی جاری کی ہے۔ ادارے کے مطابق نیا چاند 21 اکتوبر 2025 کو شام 5:25 بجے (پاکستانی وقت کے مطابق) پیدا ہوگا۔ 23 اکتوبر 2025 کی شام کو چاند کی عمر تقریباً 48 گھنٹے اور 54 منٹ ہوگی جبکہ ملک کے ساحلی علاقوں میں غروبِ آفتاب اور غروبِ ماہتاب کے درمیان 56 منٹ کا وقفہ متوقع ہے۔
ان فلکیاتی اعداد و شمار کی بنیاد پر 23 اکتوبر 2025 کی شام کو چاند نظر آنے کے امکانات بہت زیادہ ہیں (اگر موسم صاف رہا)، لہٰذا ماہِ جمادی الاول کا پہلا دن 24 اکتوبر 2025 کو ہونے کا امکان ظاہر کیا گیا ہے۔
البتہ اسلامی مہینے کے آغاز کا حتمی اعلان ہمیشہ کی طرح مرکزی رویتِ ہلال کمیٹی پاکستان کرے گی، جو ملک بھر سے موصول ہونے والی معتبر شہادتوں کی بنیاد پر فیصلہ سنائے گی۔
