سینئر اداکارہ ثانیہ سعید نے کہا ہے کہ خواتین کے ساتھ سب سے زیادہ تشدد گھروں کے اندر ہوتا ہے، کیونکہ ہمارا معاشرہ ایک ایسے نظام پر قائم ہے جہاں مرد کو ہر عمل کی اجازت حاصل ہے۔
’ایف ایچ ایم‘ کے پوڈکاسٹ میں گفتگو کرتے ہوئے ثانیہ سعید نے سماجی ناہمواریوں، عورتوں کے حقوق اور خاندانی نظام پر کھل کر اظہارِ خیال کیا۔
ان کا کہنا تھا کہ گھر کے اندر خواتین کو اکثر تشدد، جبر اور دباؤ کا سامنا رہتا ہے، اور یہ رویے اس نظام کی پیداوار ہیں جو برابری کے بجائے طاقت کے استعمال پر یقین رکھتا ہے۔
اداکارہ نے ایک حالیہ انٹرویو میں یہ بھی کہا کہ والدین بننے کے لیے ذہنی اور جذباتی مضبوطی بہت ضروری ہے، لیکن ہمارے معاشرے میں اکثر جوڑے اس ذمہ داری کے لیے تیار نہیں ہوتے۔
انہوں نے وضاحت کرتے ہوئے کہا کہ پرورش کا ہمارا نظام آمرانہ نوعیت کا ہے، جہاں والدین خود زندگی کی جدوجہد میں مصروف ہوتے ہیں، اور ایسے میں بچے پیدا کرنا ان کے ساتھ ناانصافی کے مترادف ہے۔
