بھارت کے سپر اسٹار شاہ رخ خان اور کاجول کی شہرہ آفاق فلم “دل والے دلہنیا لے جائیں گے” (DDLJ) نے ممبئی کے تاریخی مراٹھا مندر تھیٹر میں مسلسل 30 سال مکمل کر کے بالی ووڈ کی تاریخ میں ایک نیا سنگِ میل قائم کر دیا ہے۔
یہ فلم 1995 میں ریلیز ہوئی تھی، جس نے بھارتی سنیما میں رومانوی فلموں کے انداز کو یکسر بدل دیا۔ “DDLJ” نے اپنے منفرد کرداروں، دل کو چھو لینے والے مکالموں اور یادگار مناظر کے باعث لاکھوں دلوں میں اپنی جگہ بنائی — حیرت انگیز طور پر یہ فلم آج بھی اسی تھیٹر میں روزانہ ایک شو کے ساتھ نمائش پذیر ہے، جس کی بدولت یہ بھارت کی سب سے طویل عرصے تک چلنے والی فلم بن چکی ہے۔
مراٹھا مندر تھیٹر کے منیجر منوج دیسائی کے مطابق، فلم کی مقبولیت میں اب بھی کوئی کمی نہیں آئی۔ ان کے بقول، “ہر روز درجنوں سیاح، طلبہ اور نوجوان جوڑے فلم دیکھنے آتے ہیں، جبکہ ویک اینڈ پر تو تھیٹر مکمل بھر جاتا ہے۔”
فلم کے مشہور مناظر، خاص طور پر وہ یادگار ٹرین والا سین — جب راج (شاہ رخ خان) اپنی محبوبہ سمرن (کاجول) کا ہاتھ تھام کر ٹرین میں چڑھاتا ہے — آج بھی ناظرین کو جوش، جذبات اور تالیوں پر مجبور کر دیتا ہے۔
دلچسپ بات یہ ہے کہ 2015 میں تھیٹر انتظامیہ نے اس فلم کی نمائش بند کرنے کا فیصلہ کیا تھا، تاہم مداحوں کے زبردست احتجاج کے بعد اسے برقرار رکھا گیا۔
تین دہائیاں گزر جانے کے باوجود، “دل والے دلہنیا لے جائیں گے” آج بھی ممبئی کے پردے پر وہی جادو بکھیر رہی ہے جو 1995 میں کیا تھا۔
