پاکستانی ڈرامہ اور فلم انڈسٹری کی معروف اداکارہ ثروت گیلانی نے حالیہ انٹرویو میں فلم ’جوانی پھر نہیں آنی‘ کی ٹیم، بالخصوص ہمایوں سعید اور ان کی پروڈکشن ٹیم کے رویے پر کھل کر بات کی اور انہیں غیرپیشہ ورانہ رویے پر تنقید کا نشانہ بنایا۔
ثروت گیلانی، جنہوں نے متعدد کامیاب ڈراموں اور فلموں میں اپنی اداکاری کے جوہر دکھائے، فلم ’جوانی پھر نہیں آنی‘ اور اس کے سیکوئل میں بھی اہم کردار ادا کر چکی ہیں۔
ایک یوٹیوب پروگرام میں گفتگو کے دوران اداکارہ نے انکشاف کیا کہ وہ ’جوانی پھر نہیں آنی 3‘ میں کام کرنے سے گریز کر رہی ہیں۔ ان کے مطابق:
“ندیم بیگ بہت اچھے انسان ہیں اور میں ہمایوں سعید، احمد علی بٹ سمیت پوری ٹیم کو پسند کرتی ہوں، لیکن میں دوبارہ ’گل‘ کا کردار نہیں کرنا چاہتی۔ اگر کسی ٹیم کے ساتھ برسوں بعد دوبارہ کام کرنا ہو تو تعلقات بہتر رکھنا ضروری ہوتا ہے، مگر بدقسمتی سے انہوں نے ایسا نہیں کیا۔”
انہوں نے مزید بتایا کہ فلم ’جوانی پھر نہیں آنی 2‘ کی پروموشن کے دوران ان کے ساتھ غیرپیشہ ورانہ سلوک کیا گیا۔
“وہ لوگ لندن جا رہے تھے، میں نے خود اپنی بکنگ کر لی تھی مگر نہ کسی نے جواب دیا، نہ تصدیق کی، بلکہ مجھے مکمل طور پر نظرانداز کر دیا۔ ایسا محسوس ہوا جیسے کام نکلنے کے بعد میرا استعمال کر کے ایک طرف کر دیا گیا۔”
اداکارہ نے بتایا کہ وہ فلم کے تیسرے حصے میں کام کرنے سے صاف انکار کر چکی ہیں کیونکہ ان کے مطابق ان کا کردار پہلے بھی کئی مواقع پر کاٹا گیا۔
“پہلی فلم کے دوسرے اسپیل اور دوسری فلم میں میرے کئی مناظر حذف کیے گئے۔ اگر کسی اداکار کو اس کا حق نہیں دیا جاتا تو یہ ناانصافی ہے۔ میں اپنی عزتِ نفس پر سمجھوتہ نہیں کر سکتی۔ کوئی ایک بار دھوکہ دے سکتا ہے، بار بار نہیں۔”
آخر میں ثروت گیلانی نے کہا کہ اگرچہ وہ ندیم بیگ اور ہمایوں سعید دونوں کے لیے احترام رکھتی ہیں، لیکن اب وہ اپنے وقار اور خودداری پر کسی قیمت پر سمجھوتہ نہیں کریں گی۔
