ہم ٹی وی کے ڈرامہ جن کی شادی، ان کی شادی نے ناظرین کو اپنے شاندار وی ایف ایکس اور ایڈیٹنگ سے حیران کر دیا۔
پاکستانی ڈراموں میں عموماً بجٹ کی کمی کے باعث ایڈیٹنگ اور وی ایف ایکس کے مسائل دیکھنے کو ملتے ہیں، مگر اس بار ناظرین کو خوشگوار حیرت کا سامنا ہوا۔ ڈرامے میں کسی ہائی بجٹ فلم کی طرح عمدہ وی ایف ایکس اور ایڈیٹنگ دیکھنے کو ملی۔
گزشتہ قسط میں وہاج علی اور سحر خان کے ایک سین کو خاص طور پر سوشل میڈیا پر خوب سراہا جا رہا ہے، جس میں دونوں کردار ہوا میں تحلیل ہوجاتے ہیں۔ ایسے کئی مناظر میں وی ایف ایکس کا معیار غیر معمولی حد تک بہتر رہا۔
ڈرامے کی کہانی نے بھی ایسا دلچسپ موڑ لیا ہے جس نے ناظرین کو تجسس میں مبتلا کر دیا ہے کہ آگے کیا ہونے والا ہے۔
ڈرامے میں موسیقی کا بہت اہم کردار ہے۔ مرکزی او ایس ٹی (گانا) ناظرین کو بے حد پسند آ رہا ہے، جبکہ ایک اور گانا جو مختلف اقساط میں سننے کو ملتا ہے، وہ بھی لوگوں کو بہت اچھا لگ رہا ہے۔ موسیقی نے ناظرین کے بصری تجربے (visual experience) کو مزید دلکش بنا دیا ہے۔
وہاج علی اور سحر خان کی جوڑی نے مداحوں کے دل جیت لیے ہیں، اور اب سب اس انسان اور جن کی انوکھی محبت بھری کہانی دیکھنے کے لیے بے حد پُرجوش ہیں۔
