https://www.instagram.com/p/DPV_3l0jOHc/?img_index=1
پاکستانی فلم و ڈرامہ انڈسٹری کی عالمی شہرت یافتہ اداکارہ ماہرہ خان نے اپنے شہر کراچی کے حالات پر ایک جذباتی نوٹ تحریر کیا اور اس شہر سے معافی مانگ لی۔
انسٹاگرام پر پوسٹ کیے گئے پیغام میں “لو گرو” اسٹار نے لکھا کہ وہ اکثر روشنیوں کے اس شہر کو دیکھ کر حیران رہ جاتی ہیں۔ اپنے کام کی بدولت انہیں ایسی جگہوں پر جانے کا موقع ملا جہاں شاید کبھی نہ جا پاتیں—گلیوں، محلوں اور چھوٹی بستیوں میں۔
اداکارہ نے کہا کہ مسائل سب کو درپیش ہیں، لیکن انہوں نے ایسی بستیوں کو قریب سے دیکھا جہاں کئی کئی گھنٹے بجلی نہیں آتی، لوگ روزمرہ کھانے کے لیے پریشان رہتے ہیں، کچرا ہفتوں جمع رہتا ہے اور امیر و غریب کے درمیان فاصلے بہت نمایاں ہیں۔
انہوں نے لکھا کہ باوجود ان مشکلات کے، انہوں نے وہ مناظر بھی دیکھے جہاں بچے ہنستے کھیلتے نظر آتے ہیں، کچھ اسکول سے واپس لوٹ رہے ہوتے ہیں، مائیں اپنے بچوں کے لیے کھانے پکا رہی ہوتی ہیں۔ ایک گلی میں انہوں نے مندر، چرچ اور مسجد کو ساتھ دیکھا۔ ان کے مطابق، چہروں پر تھکن اور اداسی کے باوجود امید کی جھلک نمایاں تھی۔
ماہرہ خان نے اپنی ویڈیو برنس روڈ سے شروع کی اور شہر کی چھوٹی گلیوں کو دکھایا۔ آخر میں انہوں نے کراچی سے مخاطب ہوکر کہا: “میں تم سے محبت کرتی ہوں، اور مجھے افسوس ہے کہ ہم تمہاری اس طرح دیکھ بھال نہ کرسکے جیسے تم ہماری کرتے ہو۔”
