پاکستانی شوبز کی تین بڑی شخصیات فہد مصطفیٰ، ماہرہ خان اور تابش ہاشمی پہلی مرتبہ ایک ساتھ بڑے پردے پر نظر آئیں گے۔
ذرائع کے مطابق یہ پروجیکٹ فہد مصطفیٰ کے پروڈکشن ہاؤس بگ بینگ انٹرٹینمنٹ کی پہلی فلم ہوگی۔ ڈراموں میں اپنی کامیابی کے بعد یہ پروڈکشن ہاؤس اب فلمی دنیا میں قدم رکھ رہا ہے۔ اس کے ساتھ ہی تابش ہاشمی بھی اسی فلم کے ذریعے اپنا فلمی ڈیبیو کریں گے۔
فلم کا بنیادی موضوع کامیڈی پر مبنی ہوگا، جس میں رومانس کے پہلو بھی شامل کیے گئے ہیں تاکہ ناظرین کو ایک ہلکی پھلکی اور بھرپور تفریح فراہم کی جا سکے۔ فلم کا اسکرپٹ بلال عاطف خان نے تحریر کیا ہے اور وہی اس کی ہدایتکاری بھی انجام دیں گے۔
اگرچہ فلم کی ریلیز کی تاریخ کا اعلان تاحال نہیں ہوا، تاہم قریبی ذرائع کا کہنا ہے کہ اس کی شوٹنگ بہت جلد شروع کر دی جائے گی۔
