آزاد کشمیر کے مختلف اضلاع میں موسلا دھار بارش کے باعث ندی نالے اور دریا بپھر گئے، جس سے کئی مقامات پر طغیانی کی صورتحال پیدا ہو گئی۔ باغ کے ایک برساتی نالے میں سیاحوں کی گاڑی پانی کے تیز بہاؤ میں بہہ گئی، تاہم مقامی افراد نے بروقت کارروائی کرتے ہوئے گاڑی میں موجود چاروں افراد کو محفوظ نکال لیا۔
شدید بارش سے وادیٔ نیلم، مچھیارہ اور دیگر علاقوں میں پانی کی سطح میں نمایاں اضافہ ہوا۔ رتی گلی جھیل جانے والی سڑک سیلابی ریلے میں بہہ گئی، جبکہ اٹھ مقام پر کئی سیاح پانی میں پھنس گئے جنہیں ایس ڈی ایم اے نے ریسکیو کر لیا۔ مچھیارہ نالے میں طغیانی سے ایک پُل، دو مکانات اور پن چکی کو نقصان پہنچا، جبکہ ڈنہ دلیاڑ کے علاقے میں پہاڑ سے پتھر گرنے کے باعث ایک خاتون جان کی بازی ہار گئی۔
کھریگام دوسٹ، تہجیاں، جاگران اور نالہ بھمبر سمیت متعدد ندی نالوں میں شدید طغیانی رپورٹ ہوئی۔ سماہنی اور جہلم ویلی میں بارش نے پانی کے بہاؤ کو خطرناک حد تک بڑھا دیا، جس کے نتیجے میں کئی سڑکیں ملبہ گرنے سے جزوی طور پر بند ہو گئیں اور کچھ دکانیں بھی متاثر ہوئیں۔
نکیال میں نالہ مجہان، نالہ میرہ اور نالہ بان میں پانی کی سطح بلند ہو گئی، جبکہ مختلف مقامات پر لینڈ سلائیڈنگ کے واقعات پیش آئے۔ باغ کے نالہ مالوانی میں حفاظتی دیوار ٹوٹنے سے لاری اڈہ اور قریبی آبادی کو نقصان کا خدشہ ہے۔
