پاکستان نے ایک اور اہم خلائی پیش رفت کرتے ہوئے جدید ترین ریموٹ سینسنگ سیٹلائٹ لانچ کرنے کا اعلان کیا ہے، جو قدرتی آفات جیسے سیلاب، زلزلے، لینڈ سلائیڈنگ اور ماحولیاتی تبدیلیوں سے نمٹنے میں مؤثر کردار ادا کرے گا۔
تفصیلات کے مطابق، پاکستان اسپیس اینڈ اپر ایٹموسفیئر ریسرچ کمیشن (سپارکو) 31 جولائی 2025 کو چین کے ژیچانگ سیٹلائٹ لانچ سینٹر (XSLC) سے پاکستان ریموٹ سینسنگ سیٹلائٹ (PRSS) کا آغاز کرے گا۔ یہ مشن پاکستان کے خلائی پروگرام میں ایک اہم سنگِ میل کی حیثیت رکھتا ہے، جو زمین کے مشاہدے کی جدید صلاحیتیں فراہم کرے گا۔
یہ جدید سیٹلائٹ اعلیٰ معیار کے امیجنگ سسٹمز سے لیس ہے جو زراعت، شہری ترقی، ماحولیاتی نگرانی، اور قدرتی آفات سے نمٹنے جیسے شعبوں میں مؤثر معاونت فراہم کرے گا۔ اس کے ذریعے نہ صرف سیلاب، زلزلوں، برفانی تودوں کے پگھلاؤ، اور جنگلات کی کٹائی جیسے خطرات کی بروقت پیش گوئی ممکن ہوگی بلکہ وسائل کے مؤثر استعمال اور منصوبہ بندی میں بھی مدد ملے گی۔
سیٹلائٹ کی معلومات سے چین-پاکستان اقتصادی راہداری (CPEC) سمیت دیگر قومی ترقیاتی منصوبوں کے لیے بنیادی ڈھانچے کی منصوبہ بندی، جغرافیائی سروے اور نقشہ سازی میں بھی نمایاں تعاون حاصل ہوگا، جو پاکستان کی سائنسی، تکنیکی اور اقتصادی ترقی کے لیے اہم سنگِ میل ثابت ہوگا۔
