پنجاب بھر کے مختلف تعلیمی بورڈز نے میٹرک کے سالانہ امتحانات 2025ء کے نتائج جاری کر دیے ہیں۔ لاہور بورڈ کی جانب سے منعقدہ تقریب میں کمشنر لاہور ڈویژن و چیئرمین بورڈ زید بن مقصود نے نمایاں کارکردگی دکھانے والے طلباء و طالبات کے ناموں کا اعلان کیا۔
لاہور بورڈ میں رول نمبر 115235 کی حامل طالبہ حرم فاطمہ نے شاندار 1193 نمبرز حاصل کرتے ہوئے پہلی پوزیشن حاصل کی، جبکہ نور الہدیٰ اور حاجی ابوذر تنویر نے 1188 نمبر لے کر دوسری پوزیشن حاصل کی۔ محمد علی اور ملک فیضان رضا نے 1186 نمبرز حاصل کرتے ہوئے مشترکہ طور پر تیسری پوزیشن حاصل کی۔ قابل ذکر بات یہ ہے کہ فیضان کا تعلق ایک سبزی فروش خاندان سے ہے اور وہ گورنمنٹ ہائی اسکول نمبر 1 شاہکوٹ کا طالب علم ہے۔ اس نے اپنی کامیابی کا سہرا والدین کی دعاؤں اور اساتذہ کی رہنمائی کو دیا۔
ادھر ملتان بورڈ نے بھی نتائج جاری کیے، جہاں ایک لاکھ 25 ہزار امیدواروں نے شرکت کی۔ ہارون حامد نے 1193 نمبرز حاصل کر کے پہلی، حسینہ فاطمہ نے 1188 نمبرز کے ساتھ دوسری اور حافظہ عشبہ فاطمہ نے 1187 نمبرز لے کر تیسری پوزیشن حاصل کی۔ اسی نمبر کے ساتھ اصبہا فاطمہ، میرب فاطمہ اور خدیجہ نے بھی تیسری پوزیشن اپنے نام کی۔
گوجرانوالہ بورڈ کے تحت 2 لاکھ 25 ہزار 71 طلباء نے امتحان میں حصہ لیا، جن میں سے 1 لاکھ 58 ہزار 863 کامیاب قرار پائے۔ کامیابی کا تناسب 70.58 فیصد رہا۔ نمایاں بات یہ رہی کہ پہلی تین پوزیشنز 19 طلبہ و طالبات نے حاصل کیں جن میں 12 طالبات اور 7 طلبا شامل تھے۔ شفایت رسول، علیشہ زیب اور فاطمہ شیراز نے 1187 نمبرز کے ساتھ پہلی پوزیشن حاصل کی۔ محمد موحد اور محمد عبداللہ 1186 نمبرز کے ساتھ دوسرے نمبر پر رہے، جب کہ 5 طلبا نے 1185 نمبرز کے ساتھ تیسری پوزیشن حاصل کی۔
بہاولپور بورڈ میں چشتیاں کی طالبہ طیبہ امین نے 1185 نمبرز کے ساتھ پہلی پوزیشن حاصل کی، ہارون آباد کے عبداللہ رشید 1182 نمبرز کے ساتھ دوسرے اور علیزے لیاقت نے 1181 نمبرز کے ساتھ تیسرے نمبر پر آئیں۔ مجموعی طور پر 91 ہزار 643 طلباء نے امتحان میں حصہ لیا، جن میں 80 ہزار 491 سائنس اور 11 ہزار 152 آرٹس کے امیدوار شامل تھے۔
سرگودھا بورڈ کے نتائج میں مروا سہیل نے 1187 نمبرز حاصل کر کے ٹاپ پوزیشن حاصل کی، محمد سراج خان 1186 نمبرز کے ساتھ دوسرے نمبر پر آئے جبکہ محمد اسد جاوید، محمد مبین ارشد، منیب الرحمان اور عائشہ مسکان نے 1184 نمبرز کے ساتھ تیسری پوزیشن شیئر کی۔
فیصل آباد بورڈ میں محمد معیز قمر نے 1189 نمبرز حاصل کر کے پہلی پوزیشن حاصل کی، ماہم ممتاز نے 1187 نمبرز لے کر دوسرا نمبر حاصل کیا اور میرب ورک 1186 نمبرز کے ساتھ تیسرے نمبر پر رہیں۔ پوزیشن ہولڈرز کی تقریب تقسیم انعامات کل منعقد کی جائے گی۔
آخر میں ساہیوال بورڈ کے تحت 71 ہزار 789 طلباء نے میٹرک امتحانات میں شرکت کی، جن میں سے 48 ہزار 680 کامیاب ہوئے۔ کامیابی کا تناسب 67.81 فیصد رہا۔ ضلع اوکاڑہ کے محمد فیضان فرید اسرار نے 1189 نمبرز لے کر ٹاپ پوزیشن حاصل کی، ام رمان 1187 نمبرز کے ساتھ دوسرے اور محمد فیضان چوہدری نے بھی 1189 نمبرز حاصل کر کے تیسری پوزیشن اپنے نام کی۔
