یورپ میں پی آئی اے پرپابندی کا خاتمہ حکومت کی بڑی کامیابی ہے۔
ائیرلائن کے نقصانات میں کمی آئے گی، مارکیٹ ویلیو بڑھے گی۔
سازش کرنے والے ٹولے کے خلاف کاروائی کی جائے۔ میاں زاہد حسین
(02۔دسمبر۔2024)
نیشنل بزنس گروپ پاکستان کے چیئرمین، پاکستان بزنس مین اینڈ انٹلیکچولزفورم وآل کراچی انڈسٹریل الائنس کے صدر، ایف پی سی سی ائی پالیسی ایڈوائزری بورڈ کے چیئرمین اورسابق صوبائی وزیر میاں زاہد حسین نے کہا ہے کہ پاکستان کی قومی ایئرلائن پی آئی اے کی پروازوں پریورپی ملکوں میں چارسال سےعائد پابندی کا خاتمہ بڑی خوشخبری ہے۔ اس سے ائیرلائن کے نقصانات میں کمی آئے گی جس سے اسکی مارکیٹ ویلیوبڑھے گی۔ برطانیہ اورامریکہ کی جانب سے عائد پابندی کوختم کرنے کے لئے بھی کوشش کی جائے اورذاتی مفادات کے لئے پی آئی اے کوتباہ کرنے والے سیاسی بازی گروں کے خلاف کاروائی کی جائے ورنہ قومی اثاثوں اورمفادات سے کھلواڑ کا سلسلہ جاری رہے گا۔ میاں زاہد حسین نے کاروباری برادری سے بات چیت کرتے ہوئے کہا کہ پی آئی اے پریورپ اورامریکہ سمیت متعدد ممالک میں پابندی ایک غیرملکی ائیرلائن کوفائدہ پہنچانے کے لئے لگائی گئی تھی جس کا سربراہ پاکستان کے ایک انتشاری ٹولے کے قائد کا دوست ہے۔ اس مقصد کے لئے اس وقت کے وزیرہوا بازی سے قومی اسمبلی میں یہ بیان دلوایا گیا کہ پی آئی اے میں پائلٹوں کی بڑی تعداد کے لائسنس جعلی ہیں جس پردنیا بھرکی فضائی کمپنیوں کے تحفظ اورکارکردگی کے معیارکوجانچنے والے ادارے نے پی آئی اے کی درجہ بندی آخری حد تک کم کردی تھی۔ بعد ازاں اسلام آباد ہائی کورٹ نے وزیرہوا بازی کے بیان کا غلط ہونا واضح کردیا تھا مگرملک وقوم کونقصان پہنچانے پرانکے خلاف کوئی کاروائی نہیں کی گئی۔ پی ڈی ایم کی مخلوط اور نگران حکومت کے دور میں اس بے بنیاد الزام کے اثرات ختم کرنے کی کوششیں جاری رہیں تاہم پابندی کے خاتمہ میں چارسال کا طویل وقت لگا جس سے پی آئی اے کوشدید نقصان پہنچا جس کے نتیجہ میں اسکی فروخت کی کوششیں بڑھانا پڑیں جسے صرف دس ارب روپے کی بولی کی وجہ سے روک دیا گیا۔ میاں زاہد حسین نے کہا کہ یورپ میں قومی ایئرلائن کی پروازوں کی بحالی سے اس ادارے کے نقصانات کم ہوجائیں گے اوردیگرمعاملات میں بہتری کی راہیں کھلیں گی۔ واضح رہے کہ برطانیہ اوردیگریورپی ملکوں کی پروازیں پی آئی اے کیلئے سب سے زیادہ منافع بخش تھیں جنھیں سیاسی مفادات کی بھینٹ چڑھایا گیا۔ یورپ میں قومی ایئرلائن کی پروازوں کی بحالی کے بعد برطانیہ اورامریکہ میں بھی پابندی کے خاتمے کا امکان روشن ہوگیا ہے کیونکہ متعلقہ حکام نے انتھک محنت سے ہوابازی کے معیارات کی نگرانی کرنے والے اداروں کی توثیق حاصل کرلی ہے جس پرخراج تحسین انکا حق ہے۔ میاں زاہد حسین نے مزید کہا کہ پی آئی اے کی یورپ میں بحالی سے مجموعی معاشی صورتحال پرمثبت اثرپڑے گا اور بیرون ملک رہنے والے پاکستانیوں کے لیے بہت بڑی سہولت پیدا ہوگی جوخوش آئند ہے مگرمستقبل میں ملکی مفادات کونقصان پہنچانے والی سازشیں روکنے کے لئے سخت اقدامات ضروری ہیں۔
—
