ایکسپو سٹی میں پاکستان کے 78ویں یومِ آزادی کی پر وقار تقریب کل (اتوار) کو منعقد کی جائے گی۔ اس پروگرام میں 60 ہزار سے زائد افراد کی شرکت متوقع ہے۔ تقریب میں وزیر رواداری شیخ نہیان بن مبارک النہیان اور پاکستانی سفیر فیصل نیاز ترمذی بطور مہمان خصوصی شامل ہوں گے۔
یہ تقریب “امارات لوز پاکستان” کے تحت منعقد کی جائے گی، جس کا انتظام پاکستان ایسوسی ایشن دبئی اور دبئی پولیس کی معاونت سے کیا گیا ہے۔ پروگرام میں صوفیانہ موسیقی، لوک رقص اور فنونِ لطیفہ کی بھرپور نمائش ہوگی تاکہ ثقافتی ورثے کو اجاگر کیا جا سکے۔ پاکستانی فنکار ساحر علی بگا، نتاشا بیگ اور یوسف بشیر قریشی اپنی پرفارمنس پیش کریں گے۔
اس موقع پر پاکستانی کمیونٹی کی نمایاں شخصیات کو ان کی خدمات کے اعتراف میں اعزازات سے نوازا جائے گا۔ پاکستان اور متحدہ عرب امارات کے درمیان سفارتی تعلقات کو پچاس سال سے زائد ہو چکے ہیں، جبکہ متحدہ عرب امارات کی پاکستان میں سرمایہ کاری 10 ارب ڈالر سے تجاوز کر چکی ہے۔
