کراچی بار ایسوسی ایشن نے جسٹس طارق محمود جہانگیری کو ڈی نوٹیفکیشن کرنے کے فیصلے کی مذمت کردی۔ کراچی بار ایسوسی ایشن کی جانب سے جاری اعلامیئے میں کہا گیا ہے کہ جج کی برطرفی غیر معمولی عجلت میں کی گئی۔ اقدام عدلیہ کی آزادی اور آئینی خودمختاری پر حملہ ہے۔ سپریم جوڈیشل کونسل ہی ججز کیخلاف کارروائی کا واحد آئینی فورم ہے۔ قانونی تقاضوں اور التوا شدہ کیسز کے باوجود ڈی نوٹیفکیشن پر تشویش ہے۔ ججز کی سیکیورٹی آف ٹینور آئینی ضمانت ہے، اسے کمزور نہیں کیا جا سکتا۔ عدلیہ کی آزادی کمزور کرنا خطرناک نظیر ہے۔ عدالتی وقار اور عوامی اعتماد کو شدید نقصان پہنچا۔ آئین کی بالادستی ہر حال میں برقرار رہنی چاہیئے۔ اعلامیئے میں کراچی بار ایسوسی ایشن نے آئین کی بالادستی اور عدلیہ کے تحفظ کی اپیل بھی کی۔
