پاکستان پیپلز پارٹی کی مرکزی رہنماء و رکن قومی اسمبلی ڈاکٹر نفیسہ شاہ نے پہلی حسن افروز خواتین کی میراتھن ریس کا افتتاح کر دیا
خیرپور یوتھ کونسل کے زیرِ اہتمام پہلی حسن افروز میراتھن خواتین ریس کا شاندار آغاز کوٹ ڈیجی کے شہر حسین آباد سے شروع ہو کر خیرپور تک رکھی گئی ہے، جس میں ہزاروں بچیوں نے بھرپور جوش و جذبے کے ساتھ حصہ لیا۔
افتتاحی تقریب سے خطاب کرتے ہوئے ڈاکٹر نفیسہ شاہ نے کہا کہ “آج کی بیٹیاں ہماری امید بھی ہیں اور ہمارے روشن مستقبل کی بنیاد بھی۔ ایسے مقابلے لڑکیوں کے اعتماد کو بڑھاتے ہیں اور انہیں آگے بڑھنے کا حوصلہ دیتے ہیں۔”
انہوں نے مزید کہا کہ آج کے دور میں اس قسم کے مثبت اور صحت مند ایونٹس نہایت ضروری ہیں، تاکہ لڑکیاں تعلیم، کھیل، صحت اور سماجی سرگرمیوں میں بھرپور کردار ادا کرتے ہوئے اپنا مقام بنائیں۔
میاراتھن میں شرکت کرنے والی بچیوں کے لیے پہلی، دوسری اور تیسری پوزیشن حاصل کرنے والوں کو نقد انعامات اور ٹرافیاں دی جائیں گی۔
شہریوں اور والدین کی بڑی تعداد بھی ریس کے راستے پر اپنی بچیوں کی حوصلہ افزائی کے لیے موجود رہی۔ شرکاء کا کہنا تھا کہ اس طرح کے ایونٹس سے سندھ کی بیٹیوں کا حوصلہ بڑھتا ہے اور انہیں یہ پیغام ملتا ہے کہ وہ کسی بھی میدان میں پیچھے نہیں۔
سیدہ نفیسہ شاہ نے کہا کہ “جب ایک لڑکی آگے بڑھتی ہے تو پوری قوم ترقی کرتی ہے، اور آج کی یہ ریس ثابت کر رہی ہے کہ ہماری بیٹیاں ہر چیلنج قبول کرنے کی صلاحیت رکھتی ہیں۔”
