کیرئیر فیئر: اکیڈمیا، انڈسٹری رابطے کو مضبوط کرتا ہے، ڈاکٹر طفیل
تعلیمی ادارے اور انڈسٹری کے مابین ایک مضبوط پُل قائم کرنا مقصد ہے، ڈاکٹر علی ذوالقرنین
این ای ڈی یونیورسٹی میں طلبا کے لیے کریئر فیئر کا انعقاد کیا گیا
کراچی (اسٹاف رپورٹر) این ای ڈی یونیورسٹی آف انجینئرنگ اینڈ ٹیکنالوجی میں طلبا کے لیے کریئر فیئر کا انعقاد کیا گیا، جس میں پچاس سے زائد قومی و بین الاقوامی کمپنیوں نے شرکت کی۔ اس موقعے پر خطاب کرتے ہوۓ شیخ الجامعہ ڈاکٹرمحمد طفیل کا کہنا تھا کہ اس کیرئیر فیئر، میلے کا مقصد طلبا کو روزگار، تربیت، انڈسٹری سے براہِ راست رابطے اور کیریئر گائیڈنس فراہم کرنا تھا۔ این ای ڈی یونیورسٹی میں منعقدہ ایک روزہ کرئیر فیئر میں مختلف شعبوں کے انجینئرنگ، کنزیومر گڈز، آئی ٹی، سافٹ ویئر ڈویلپمنٹ، سول انجینئرنگ، بینکنگ، ای کامرس، فنانس، سوشل سیکٹر اور ایجوکیشن سے تعلق رکھنے والی کمپنیوں نے اپنے اسٹالز قائم کیے، جہاں طلبا نے ایک جانب جاب انٹرویوز دیئے اور دوسری جانب سی وی جمع کروائی گئیں۔ ان کا مزید کہنا تھا کہ کرئیر فیئر ناصرف طلبا اور کمپنیوں کو آپس میں جوڑتا ہے بلکہ تعلقات عامہ، نئی شراکت داریوں اور انڈسٹری اکیڈمیا لنکیج کو بھی مضبوط کرتا ہے۔ اس موقعے پر ڈائریکٹوریٹ آف انڈسٹریل لائژن کے ڈائریکٹر ڈاکٹر علی ذوالقرنین اور جوائنٹ ڈائریکٹر ڈاکٹر حیدر علی نے کہا کہ این ای ڈی یونیورسٹی ڈگری پروگرام کے دوران ہی طلبا میں وہ عملی مہارتیں پیدا کرتی ہے، جو انہیں مارکیٹ میں قابلِ قبول بناتی ہیں۔ان کا مزید کہنا تھا کہ ہمارا مقصد تعلیمی اداروں اور انڈسٹری کے درمیان ایک مضبوط پُل قائم کرنا ہے تاکہ طلبا گریجویشن کے فوراً بعد ملازمت کے حصول میں مشکلات کا شکار نہ ہوں۔ انہوں نے بتایا کہ اس سال اسٹارٹ اپس اور نئے بزنس آئیڈیاز کے لیے بھی خصوصی اسٹالز رکھے گئے تاکہ نوجوان اپنی تخلیقی صلاحیتیں پیش کرسکیں۔ترجمان جامعہ این ای ڈی فروا حسن کے مطابق طلبا نے اس موقعے کا فائدہ اٹھاتے ہوۓ انڈسٹری کی ضرورتوں سے متعلق معلومات بھی حاصل کیں جب کہ ملٹی نیشنل کمپنیوں کے نمائندوں نے طلبا کو روزگار کے جدید رجحانات اور مارکیٹ میں درکار مہارتوں سے متعلق آگاہ کیا۔ میلے میں شریک طالب علموں کا کہنا تھا کہ انہیں اپنی سی وی جمع کرانے، مختلف کمپنیوں سے براہِ راست گفتگو کرنے اور بیرون ملک تعلیم و ملازمت کے حوالے سے رہنمائی حاصل کرنے کا موقع ملا۔ کئی کمپنیوں نے طالب علموں کے لیے ٹیسٹس اور آن اسپاٹ اسکریننگ بھی کی۔ اس موقعے پر صنعتوں سے آۓ افراد میں شیلڈز پیش کی گئیں۔
جامعہ این ای ڈی کے شعبہ ڈائریکٹریٹ آف انڈسٹریل لائژن کے زیرِ اہتمام منعقدہ کیئرئیر فیئر 2025 میں شیخ الجامعہ ڈاکٹر محمد طفیل اور ڈائریکٹر ڈاکٹر علی ذوالقرنین کا انڈسٹری نمائندگان کے ساتھ گروپ فوٹو
