کراچی
مورخہ 18 نومبر 2025 بروز منگل ( )
سندھ کے مشیر براۓ کچی آبادی سید نجمی عالم نے اینجلز ویلفیئر فاؤنڈیشن کی جانب سے معذور افراد کی بحالی کے لیے کیے گئے اقدامات کو سراہتے ہوے کہا ہے کہ حکومت اور سماجی بہبود کے ادارے اشتراک عمل سے معاشرے کو مثبت نتائج دے سکتے ہیں ۔ اس تناظر میں اینجلز ویلفیئر فاؤنڈیشن کی خدمات قابل لائق ستائش و مشعل راہ ہیں جو معذور افراد کو زندگی میں آگے بڑھنے میں مدد فراہم کر رہا ہے۔
اپنی اہلیہ محترمہ انیلہ نجمی کے ہمراہ اینجلز ویلفیئر فاؤنڈیشن کے زیر تحت خدمات انجام دینے والے معذور بچوں کے مرکز کے دورے کے موقع پر انہوں نے کہا کہ معذور افراد کو معاشرے کا بہتر فرد بنانے کے لیے یہ فاؤنڈیشن اپنی خدمات موثر انداز میں اور بطریق احسن انجام دے رہی ہے ادارے کی روح رواں نورین بٹ اور خضر چوہان نے شب و روز محنت سے اپنا لوہا منوایا ہے ۔ انہوں نے مزید کہا کہ حکومت سندھ بھی معذور افراد کی بحالی کے لیے اپنا نمایاں کردار ادا کر رہی ہے فاؤنڈیشن کو وزارت براۓ خصوصی تعلیم سے روابط کو مظبوط کرنا چاہیے اور محکمہ سماجی بہبود سے بھی اشتراک عمل میں پیش رفت کرنی چاہیے تاکہ خدمت کا دائرہ وسیع هو ۔ انہوں نے کہا کہ سندھ حکومت نے معذور افراد کی فلاح کے لیے مختلف منصوبے شروع کیے ہیں تاکہ وہ اپنی زندگی کو بہتر طریقے سے گزار سکیں۔ ہماری کوشش ہے کہ معذور افراد کو معاشرے میں ایک بہتر مقام دیا جائے اور انہیں اپنی صلاحیتوں کو ظاہر کرنے کا موقع دیا جائے ۔ ایم این اے ڈاکٹر شاہدہ رحمانی نے کہا کہ میں امید کرتی ہوں کہ اینجلز ویلفیئر فاؤنڈیشن اپنی خدمات جاری رکھے گی اور ہم مل کر ایک بہتر معاشرے کی تعمیر میں اپنا کردار ادا کریں گے۔ معذور افراد کی بحالی کے لیے ہماری یہ کوششیں اس بات کا ثبوت ہیں کہ ہم ایک بہتر اور مساوی معاشرے کی تعمیر کے لیے جدی ہیں۔” اس موقع پر نورین بٹ نے اپنے ادارے کی کارکردگی پر روشنی ڈالی اور وزیر موصوف کو بتایا کہ انکی اہلیہ انیلہ نجمی بھی معذور افراد کیلئے کی جانے والی خدمات میں پیش پیش ہیں اور ادارے کی رہنمائی کرتی ہیں ۔ بعد ازاں صوبائی مشیر نے ایم این اے شاہدہ رحمانی اور انیلہ نجمی کے ہمراہ ادارے کا دورہ کیا اور معصوم خصوصی بچوں میں گھل مل گئے ۔ فاؤنڈیشن کے خضر چوہان کے علاوہ دیگر بھی موجود تھے ۔
