محکمہ انسانی حقوق سندھ کے ایک وفد نے وزیراعلیٰ سندھ کے معاونِ خصوصی برائے انسانی حقوق راجویر سنگھ سوڈھا کی قیادت میں ڈائریکٹر ہیومن رائٹس آغا فخر حسین کے ہمراہ سیف سٹی پروجیکٹ اور سندھ پولیس کے کمپلینٹ مینجمنٹ سسٹم (CMS) کا دورہ کیا۔ وفد کا استقبال سینٹرل پولیس آفس (سی پی او) کراچی میں ڈی آئی جی ہیڈ کوارٹرز مظہر نواز شیخ نے کیا۔ سینئر سپرنٹنڈنٹ آف پولیس (ایس ایس پی) سید محمد علی رضا شاہ نے سیف سٹی آپریشنز پر ایک جامع اور تفصیلی بریفنگ دی۔ انہوں نے شہر بھر میں جرائم کی روک تھام اور عوامی تحفظ کو بڑھانے کے لیے رئیل ٹائم مانیٹرنگ سسٹم، مربوط نگرانی کے نظام، کمانڈ سینٹر آپریشنز اور جدید ٹیکنالوجی کے استعمال پر بریف کیا۔وفد نے مزید کمپلینٹ مینجمنٹ سسٹم (CMS) کا دورہ کیا جہاں ایس ایس پی سید محمد علی رضا شاہ اور سی ایم سی ٹیم نے انہیں ڈیجیٹل شکایت اندراج، شکایات کی درجہ بندی، مانیٹرنگ کے طریقہ کار اور CMS اور سندھ ہیومن رائٹس ڈپارٹمنٹ کے کمپلینٹ سیل کے مابین مربوط طریقہ کار سے آگاہ کیا۔ محکمہ نے انسانی حقوق سے متعلق شکایات کے شفاف، جوابدہ اور مؤثر ازالے کے لیے سی ایم ایس کے اہم کردار کو سراہا۔
وزیراعلیٰ کے معاونِ خصوصی برائے انسانی حقوق راجویر سنگھ سوڈھا نے اس موقع پر اپنے خیالات کا اظہار کرتے ہوئے سندھ پولیس کی پیشہ ورانہ مہارت اور عوامی خدمت کے جذبے کی تعریف کی۔ انہوں نے سیف سٹی پروجیکٹ اور سی ایم ایس کو جدید پولیسنگ اور شہریوں کے مضبوط تحفظ کی جانب اہم اقدامات قرار دیا۔ انہوں نے مزید اعلان کیا کہ سندھ ہیومن رائٹس ڈپارٹمنٹ صوبے بھر میں آئندہ انسانی حقوق آگاہی پروگراموں میں ان نظاموں سے متعلق عوامی آگاہی کو شامل کرے گا۔ڈائریکٹر ہیومن رائٹس آغا فخر حسین نے اس بات پر زور دیا کہ یہ دونوں ادارے عوامی تحفظ، ادارہ جاتی شفافیت اور قانون کی حکمرانی کے فروغ میں نمایاں پیش رفت کے حامل ہیں۔ سندھ ہیومن رائٹس ڈپارٹمنٹ اور سندھ پولیس نے انسانی حقوق کے تحفظ اور شکایات کے مؤثر ازالے کے لیے اپنے باہمی تعاون کو جاری رکھنے کے عزم کا اعادہ کیا۔
