وفاقی وزیر مواصلات عبدالعلیم خان نے موٹروے ایم 5 جلال پور پیر والا کا دورہ کیا اور سیلاب کے بعد جاری بحالی کے اُمور کا معائنہ کیا۔ وفاقی وزیر نے این ایچ اے حکام کو مرمتی کاموں کی معیاری اور بروقت تکمیل کی ہدایات جاری کرتے ہوئے کہا کہ 30 نومبر تک موٹروے کی یکطرفہ بحالی ہر صورت یقینی بنائی جائے۔
انہوں نے کہا کہ ٹریفک کی بحالی اور شہریوں کو درپیش مشکلات کا جلد از جلد ازالہ کیا جائے۔ غیر معیاری کام کسی صورت برداشت نہیں ہوگا۔انہوں نے ایک ہفتے میں پراگرس رپورٹ طلب کرتے ہوئے کہا کہ وہ دوبارہ دورہ بھی کریں گے۔
عبدالعلیم خان نے ایم 5 پر ریسٹ ہاؤسز کا بھی دورہ کیا اور ناقص انتظامات پر این ایچ اے حکام کی سرزنش کی۔ انہوں نے کہا کہ صاف ستھرے واش رومز اور ٹک شاپس کی سہولیات یقینی بنائی جائیں کیونکہ مسافروں کا حق ہے کہ انہیں زیادہ سے زیادہ سہولیات فراہم کی جائیں۔ ان کا کہنا تھا کہ اگر سہولت معیاری اور مناسب ہو تو شہری ٹیکسز ادا کرنے پر بھی آمادہ ہوتے ہیں۔
وفاقی وزیر مواصلات نے کہا کہ موٹروے ایم 5 کو محفوظ اور آرام دہ بنانے کی ہدایات جاری کر دی گئی ہیں۔ اس موقع پر این ایچ اے حکام نے وفاقی وزیر کو اب تک کی صورت حال پر بریفنگ بھی دی۔
