جنوبی کوریا کی الیکٹرانکس کمپنی سام سنگ الیکٹرانکس نے رواں ماہ کئی میموری چپس کی قیمتوں میں ستمبر کے مقابلے 60 فیصد تک اضافہ کر دیا ہے۔
خبرایجنسی کے مطابق یہ اضافہ اس شدید عالمی قلت کے باعث کیا گیا ہے جو اے آئی ڈیٹا سینٹرز کی تیزی سے بڑھتی تعمیر کے نتیجے میں پیدا ہوئی ہے۔ رپورٹ کے مطابق اس خبر کے بعد سام سنگ، ایس کے ہائنکس اور امریکی چپ ساز کمپنیوں کے شیئرز میں نمایاں اضافہ دیکھا گیا جو اس حقیقت کی نشاندہی کرتا ہے کہ مصنوعی ذہانت کے بوم نے نہ صرف اے آئی مخصوص چپس بلکہ ان میں استعمال ہونے والی میموری چپس کی مانگ میں بھی غیر معمولی اضافہ کر دیا ہے۔
ذرائع کے مطابق دنیا کی سب سے بڑی میموری چپ بنانے والی کمپنی سام سنگ نے اکتوبر میں سپلائی کنٹریکٹس کے لیے قیمتوں کے سرکاری اعلان میں تاخیر کی حالانکہ عام طور پر ماہانہ بنیاد پر قیمتوں کا تعین کیا جاتا ہے۔یہ چپس بنیادی طور پر سرورز میں استعمال ہوتی ہیں، میموری چپس کی قیمتوں میں اضافے سے ڈیٹا انفراسٹرکچر بنانے والی بڑی کمپنیوں پر مالی دباؤ بڑھ رہا ہے جبکہ اس کے نتیجے میں اسمارٹ فونز اور کمپیوٹرز کی قیمتوں میں بھی اضافہ ہوسکتا ہے ۔
ماہرین کے مطابق بڑے سرور میکرز اب یہ قبول کر چکے ہیں کہ انہیں مطلوبہ مقدار میں چپس نہیں مل سکیں گی، قیمتوں میں غیر معمولی پریمیم ادا کیا جا رہا ہے۔ان کے مطابق 32 جی بی ڈی ڈی آر 5میموری ماڈیول کی قیمت ستمبر کے 149 ڈالر سے بڑھ کر نومبر میں 239 ڈالر تک پہنچ گئی ہے۔
رپورٹ کے بعد پیر کی صبح سام سنگ کے حصص 3 فیصد اور ایس کے ہائنکس کے حصص 6 فیصد بڑھ گئے۔دیگر ڈی ڈی آر 5 چپس کی قیمتوں میں بھی اضافہ ریکارڈ کیا گیا اور سام سنگ کی 16 جی بی ڈی ڈی آر 5 کی قیمت 50 فیصد اضافہ سے 135 ڈالر اور 128 جی بی ڈی ڈی آر 5 کی قیمت 50 فیصد بڑھ کر 1194 ڈالر ہو گئی جبکہ 64 جی بی اور 96 جی بی ڈی ڈی آر 5کی قیمتوں میں 30 فیصد سے زائد اضافہ ریکارڈ کیا گیا۔
رپورٹ کے مطابق سام سنگ اکتوبر تا دسمبر سہ ماہی میں 40فیصد سے 50 فیصد تک مزید اضافہ کرے گا جو مجموعی انڈسٹری میں متوقع 30 فیصد اضافے سے کہیں زیادہ ہے۔انہوں نے کہاکہ کمپنی کو مکمل یقین ہے کہ قیمتیں بڑھتی رہیں گی کیونکہ ڈیمانڈ بہت زیادہ ہے اور کمپنیاں 2026 اور 2027 تک کے طویل المدتی معاہدے کر رہی ہیں۔
دوسری جانب چین کی سب سے بڑی کنٹریکٹ چپ ساز کمپنی نے بتایا کہ میموری چپ کی کمی کی وجہ سے گاہک دیگر اقسام کی چپس کے آرڈر روک رہے ہیں۔چینی اسمارٹ فون اور الیکٹرانکس کمپنی شیاومی نے بھی خبردار کیا ہے کہ بڑھتی قیمتوں نے موبائل فون بنانے کے اخراجات میں نمایاں اضافہ کر دیا ہے۔
ماہرین کے مطابق چونکہ سام سنگ نے اے آئی چپس کی طرف نسبتاً سست رفتار سے پیش قدمی کی تھی، اس لیے اب اس کے پاس میموری چپس میں زیادہ قیمتیں لینے کی طاقت موجود ہے، جو اسے ایس کے ہائنکس اور مائکرون جیسے حریفوں پر برتری دلا رہی ہے۔
